بسم اللہ الرحمن الرحیم

<مکتوب خادم>

مولانا عبدالحفیظ امیر پوری رحمۃ اللہ علیہ

السلام علیکم ورحمة اللہ وبرکاته....

اللہ تعالی کے ”عقلمند“ بندے وہ ہیں..جو اپنی زندگی میں..اپنی موت کی تیاری کرتے ہیں..ایسے اعمال کرتے ہیں جو موت کے بعد کام آئیں..اور اس بارے میں ہمیشہ غور و فکر کرتے رہتے ہیں کہ..وہ اپنے لیے آگے کیا بھیج رہے ہیں:-

”وَ لْتَنْظُرْ نَفْسٌ مَّا قَدَّمَتْ لِغَدٍ“(الحشر۱۸)

ترجمہ: ہر شخص کو غور کرنا چاہیے کہ وہ کل (یعنی آخرت) کے لیے کیا بھیج رہا ہے..

آپ نے ہفت روزہ ”القلم“..اور پندرہ روزہ ”مدینہ مدینہ“ میں ایک نام پڑھا ہوگا..

”عبدالحفیظ امیر پوری“

یہ بندہ کے چچا زاد بھائی تھے..عرصہ دراز سے جماعت کے ساتھ وابستہ تھے اور باقاعدگی سے کالم لکھتے تھے..آج وہ اللہ تعالی سے ملاقات کو چلے گئے..

..انا للہ وانا الیہ راجعون..

اللہ تعالی ان کو اپنی مغفرت اور رحمت کا عالی مقام نصیب فرمائیں..ماشاءاللہ عالم دین اور صاحب قلم تھے..انکی نماز جنازہ کل بروز منگل دن گیارہ بجے..ان شاءاللہ ”جامعۃ الصابر بہاولپور“ میں ادا کی جائے گی..قریب والوں سے شرکت کی..اور دور والوں سے ”ایصال ثواب“ کی درخواست ہے..

② جمادی الاولی ۱۴۴۸ھ کا چاند ہو گیا ہے..چاند رات جاری ہے..دعاء و معمولات کی یاد دہانی ہے..

والسلام

خادم.....لااله الاالله محمد رسول الله

بسم اللہ الرحمن الرحیم

<مکتوب خادم>

اِختِلَافْ

السلام علیکم ورحمة اللہ وبرکاته....

اللہ تعالی کے پیارے پیارے نام ہیں..یعنی أَسماءُ الحُسنٰی..ان أَسماءُ الحُسنٰی میں سے ایک”الحَقُّ جلّ شانہ“ ہے..اللہ تعالی ہمیں اپنے اِس مبارک ”اِسم صفاتی“ کی برکت سے..”حق“ نصیب فرمائیں..”حق“ پر چلائیں..”حق“ کا ”داعی“ اور ”مُوصِی“ بنائیں.....

اس دنیا کی ”خوبصورتی“ اختلاف سے ہے..ہر انسان دوسرے سے مختلف..ہر ”حیوان“ دوسرے سے مختلف..حتی کہ ہر درخت اور پتھر دوسرے سے مختلف..

” اختلاف“ انسان کی ”فطرت“ میں موجود ہے..جس طرح بھوک اور پیاس انسان کی فطرت میں داخل ہیں..حضور اقدس صلی اللہ علیہ وسلم کی شریعت نے جس طرح بھوک اور پیاس مٹانے کے اصول، قوانین اور حدود مقرر کر دیئے ہیں..اسی طرح ”اختلاف“ کے بھی قوانین، حدود اور اصول ارشاد فرما دیے ہیں..ہر ”اختلاف“ اچھا نہیں ہوتا..اور ہر اختلاف بُرا بھی نہیں ہوتا..اختلاف ”سفر“ کی طرح ہے اس سے انسان کے ”اخلاق“ کا پتہ چل جاتا ہے..ہر ”اختلاف“ سے بچنے کی کوشش کرنا یہ انسان کو ”منافق“ بنا دیتا ہے..اور ہر اختلاف میں کود پڑنا..یہ انسان کو ذلت اور محرومی میں ڈال دیتا ہے..کسی اختلاف میں دونوں طرف ”حق“ کی گنجائش ہوتی ہے جبکہ..بعض اختلافات میں دونوں طرف ”باطل“ ہوتا ہے..جبکہ بعض اختلافات میں ایک طرف ”حق“..اور ایک طرف ”باطل“ ہوتا ہے..بعض ”اختلاف“ ضروری ہوتے ہیں..بعض جائز ہوتے ہیں..بعض فضول ہوتے ہیں..جبکہ بعض اختلافات مکروہ اور حرام ہوتے ہیں..اختلاف میں ”نیت“ کا بھی بڑا دخل ہوتا ہے...اور یہ بھی دیکھنا ضروری ہوتا ہے کہ..اس ”اختلاف“ میں پڑنے سے مجھے اور اُمت کو کیا فائدہ ہوگا...

 حضرت آقا محمد مدنی صلی اللہ علیہ وسلم اپنی تہجد کی نماز کا آغاز ہی اس دعاء سے فرماتے تھے کہ..اللہ تعالی اختلافی معاملات میں مجھے ”حق“ پر رکھیں...یہ دعاء بخاری شریف اور دیگر کتب حدیث میں موجود ہے..بندہ اس پر ایک پورا مضمون بھی لکھ چکا ہے..آپ صلی اللہ علیہ وسلم تو ”ہر حال“ اور ”ہر قال“ میں ”برحق“ ہیں..یہ دعاء دراصل اُمت کی تعلیم کے لیے تھی..

بہرحال ”اختلاف“ کے معاملہ میں شریعت کی پیروی ضروری ہے..لیکن یہ بات سوشل میڈیا کے بے غسل، بے وضو، بے لگام طبقے کو کون سمجھائے؟

چلیں اللہ تعالی کا شکر ہے..جمعہ شریف آرہے ہیں..مغرب سے مقابلہ حسن کے ساتھ شاندار....ایماندار استقبال نصیب ہو.....

والسلام

خادم.....لااله الاالله محمد رسول الله

بسم اللہ الرحمن الرحیم

<مکتوب خادم>

”دُعَاءُالشَّیخَینْ“

السلام علیکم ورحمة اللہ وبرکاته....

اللہ تعالی کا شکر کہ..انہوں نے اس اُمت کو..حضرت سیدنا صدیق اکبر رضی اللہ عنہ جیسے..خلیفہ اول، خلیفہ بلا فصل، خلیفہ راشد عطاء فرمائے...والحمدللہ رب العالمین..

کل جو پیاری دعاء لکھی تھی..وہ پیارے اور عظیم انسان کامل..حضرت سیدنا ابوبکر صدیق رضی اللہ عنہ مانگا کرتے تھے..سیدنا حضرت محمد صلی اللہ علیہ وسلم کے بعد....ہمارے اور پوری اُمت کے سب سے بڑے مُحسِنْ سیدنا ابوبکر صدیق رضی اللہ عنہ..

(اللهم) یا اللہ تعالی جی (لَا تَدَعْنَا) ہمیں نہ چھوڑیں (فِی غَمْرَةٍ) گمراہی، عیاشی اور گناہوں میں ڈوبا ہوا....آخرت کی تیاری سے غافل ہو کر دنیا کے نشے میں ڈوبا ہوا..یعنی ہم اگر ایسی حالت میں ہیں تو آپ ہمیں اُس سے نکال  دیجئے (وَلَا تَأخُذْنَا) اور ہمیں نہ پکڑیں (عَلىٰ غِرَّۃٍ) دھوکے اور غفلت میں پڑا ہوا..یعنی ہم کسی گناہ میں ہوں..یا کسی مستی میں ہوں اور اچانک اس حالت میں موت آجائے..اس سے ہماری حفاظت فرما دیجئے (وَلَا تَجْعَلْنَا) اور ہمیں نہ بنائیے (مِنَ الغَافِلِينْ) غافلوں میں سے..دین سے غافل..قرآن سے غافل..فرائض سے غافل..اپنی شرعی ذمہ داریوں سے غافل..آخرت کی تیاری سے غافل..قبر، حشر، آخرت سے غافل..اللہ تعالی فرماتے ہیں..لوگوں کے حساب کا وقت قریب آگیا..جبکہ وہ غفلت میں پڑے ہوئے ہیں..قرآن مجید جا بجا غفلت سے روکتا ہے....دیکھا آپ نے کتنی جامع اور ضروری دعاء ہے..

..اللهم لَا تَدَعْنَا فِی غَمْرَةٍ وَلَا تَأخُذْنَا عَلىٰ غِرَّۃٍ وَلَا تَجْعَلْنَا مِنَ الغَافِلِينْ...

مصنف ابن ابی شیبہ کی ایک روایت کے مطابق..حضرت سیدنا فاروق اعظم رضی اللہ عنہ نے بھی اپنے آخری وقت یہی دعاء مانگی تھی..(وہاں مفرد یعنی واحد متکلم کا صیغہ آیا ہے)

”اللهم لَا تَدَعْنِی فِی غَمْرَةٍ وَلَا تَأخُذْنِی عَلىٰ غِرَّۃٍ وَلَا تَجْعَلْنِی مِنَ الغَافِلِينْ“

یا اللہ مجھے گمراہی اور گناہ میں مدہوش نہ چھوڑیں اور مجھے اچانک نہ پکڑیں اور مجھے غافلوں میں سے نہ بنائیں..

بعض جگہ الفاظ کچھ آگے پیچھے ہیں...مگر مفہوم اور مقصد ایک ہی ہے..

سبحان اللہ!..اب تو یہ ”دُعَاءُالشَّیخَین“ ہو گئی..رضی اللہ عنہما...وہ جو کبھی غافل اور گناہوں میں مست ہوتے ہی نہ تھے..وہ یہ دعاء مانگتے تھے..تو پھر ہمارے لیے یہ کتنی اہم ہوگی....جو کبھی ”بیدار“ ہی نہیں ہوتے..مغرب جمعہ شریف،مقابلہ حسن مرحبا!

والسلام

خادم.....لااله الاالله محمد رسول الله

بسم اللہ الرحمن الرحیم

<مکتوب خادم>

پیارے انسان کی پیاری دعاء

السلام علیکم ورحمة اللہ وبرکاته....

اللہ تعالی کسی ”خنّاس“ کو ہم پر مسلط نہ فرمائیں..وہ انسان ہو یا جن..اللہ تعالی ”بُرے قرین“..”بُرے دوست“ اور ”بُرے ہمزاد“ سے ہماری حفاظت فرمائیں...

”خنّاس“ کون ہے؟ بتایا گیا کہ”خنّاس“ بے شمار ہیں..وہ ہر زمانے میں ہوتے ہیں..اور ہر مسلمان پر حملہ آور ہوتے ہیں....ان کا کام ہے دل میں وسوسہ، شبہ اور بدگمانی ڈالنا..اور وہ بھی نہایت اُستادی کے ساتھ...مہارت کے ساتھ...بظاہر خیر خواہی جتلا کر...باتوں ہی باتوں میں...ایسا وسوسہ...جو آپ سے کسی اچھی محبت کو چھین لے..کسی اچھے عمل کو چھین لے..کسی اچھی جماعت کو چھین لے...کتنے لوگ نیک اعمال میں لگے ہوتے ہیں..کوئی آکر ایسا وسوسہ ڈالتا ہے کہ وہ....غفلت میں جا گرتے ہیں..کسی کے ساتھ تعلق آپ کو دینی فائدہ اور ترقی دے رہا ہے...خنّاس نے اُس کے خلاف ایسا وسوسہ چھوڑا کہ..وہ تعلق ٹوٹ گیا..فوائد رک گئے..بڑا تفصیلی موضوع ہے..قرآن مجید کی آخری ”سورۃ“ میں بھی مذکور ہے..اور کئی دیگر مقامات پر بھی...آخری سورۃ مبارکہ تو اس سے حفاظت کا ذریعہ بھی ہے..جو لوگ دین سے، جماعت سے بدظن ہو جاتے ہیں..یا خوفزدہ ہو کر امن کی راہیں ڈھونڈنے لگتے ہیں..یا مصلحت و ضرورت کے بہانے دنیا میں مشغول ہو جاتے ہیں..یا مایوس ہو کر راستہ بدلنے لگتے ہیں..ان سے عرض کیا جاتا ہے کہ توجہ کے ساتھ...روز سو بار..یا کم از کم صبح و شام گیارہ بار...قرآن مجید کی آخری دو سورتیں پڑھا کریں..الحمدللہ اس عمل کی برکت سے کئی تو گڑھے تک پہنچ کر..واپس آگئے..مگر کئی نے اس گزارش کو بھی نہ مانا..وہ پہلے خود ”خناس“ کا شکار ہوئے اور پھر ترقی کرتے کرتے خود ”خناس“ بن گئے..اور کام والوں کو مایوس، پریشان اور بدظن کرنے لگے..خیر یہ آج ہمارا موضوع نہیں...اصل موضوع تو ایک بہت پیاری دعاء ہے..جو ایک بہت ہی پیارے انسان مانگا کرتے تھے..غفلت کی حالت میں موت سے حفاظت کی دعاء.....

اللهم لَا تَدَعْنَا فِی غَمْرَةٍ وَلَا تَأخُذْنَا عَلىٰ غِرَّۃٍ وَلَا تَجْعَلْنَا مِنَ الغَافِلِينْ...

دعاء کی تفصیل اگلے مکتوب میں ان شاءاللہ.....

والسلام

خادم.....لااله الاالله محمد رسول الله

بسم اللہ الرحمن الرحیم

<مکتوب خادم>

حقائق میں ڈوب جائیں

السلام علیکم ورحمة اللہ وبرکاته....

اللہ تعالی آپ ”حق“ ہیں..آپ”برحق“ہیں..آپ سب سے بڑی ”حقیقت“ ہیں...سب سے سچی ”حقیقت“ ہیں..

”اللّٰھم اَنْتَ الحَقْ“

یا اللہ! آپ کے تمام وعدے ”حق“ ہیں..”برحق“ ہیں..بالکل سچی ”حقیقت“ ہیں...

”و وَعْدُكَ الْحَقُّ“

یا اللہ تعالی! آپ کا فرمایا ہوا...”حق“ ہے..” برحق“ ہے..بالکل سچی ”حقیقت“ ہے..

”وَقَوْلُكَ الحَقُّ“

یا اللہ! آپ کی ملاقات ”حق“ ہے..”برحق“ ہے.. موت ”حقیقت“ ہے..وہی آپ سے ملاقات ہے..

.. وَلِقَاؤُكَ الحَقُّ..

یا اللہ! جنت ”حق“ ہے..”برحق“ ہے..پکی سچی ”حقیقت“ ہے..

”وَالْجَنَّةُ حَقٌّ“

یا اللہ! ”جہنم، آگ“حق ہے..برحق ہے..ایک یقینی حقیقت ہے..

”وَالنَّارُ حَقٌّ“

یا اللہ! آپ کے تمام انبیاء علیہم الصلوٰۃ والسلام ”حق“ ہیں..”برحق“ ہیں..سچے ہیں..حضرت سیدنا آدم علیہ الصلٰوۃ والسلام سے لیکر..حضرت سیدنا و مولانا محمد صلی اللہ علیہ والہ وسلم تک...

” وَالنَّبِيُّونَ حَق“

یا اللہ! قیامت ”حق“ ہے..”برحق“ ہے..بالکل پکی ”سچی“ لازمی حقیقت ہے..

”وَالسَّاعَةُ حَقٌّ“

حضرت آقا محمد مدنی صلی اللہ علیہ وسلم..جب تہجد کے لیے بیدار ہوتے تھے تو یہ ”دعاء“ پڑھا کرتے تھے..دنیا دراصل دھوکے کی جگہ ہے..انسان کے دل و دماغ سے اصل ”حقائق“ نکل جاتے ہیں..اور وہ نقلی، عارضی اور فانی فکروں میں خود کو ضائع کرنے لگتا ہے..اس لیے لازم ہے کہ آنکھ کھلتے ہی خود کو....یہ ”حقائق“ یاد دلائے جائیں..اپنے ایمان کو درست کیا جائے..اور ان ”حقائق“ میں کامیابی کو اپنی اصل فکر بنایا جائے...

(مفید مشورہ) آج منگل کا دن اور دنیا کے اکثر خطوں میں ۱۷ ربیع الثانی ہے..جسمانی، قلبی، سفلی، آسیبی، وہمی اور نظری امراض کا بہترین علاج ”حجامہ“ بھی ہے..موقع سے فائدہ اٹھائیں...(”پاکستانی چاند “بدھ کے دن ”سترہ“ کا ہوگا)...

والسلام

خادم.....لااله الاالله محمد رسول الله

بسم اللہ الرحمن الرحیم

<مکتوب خادم>

مُکمَّل اخلاق

السلام علیکم ورحمة اللہ وبرکاته....

اللہ تعالی....اپنے حبیب، اپنے خلیل، اپنے آخری نبی حضرت محمد صلی اللہ علیہ وسلم کی شان بڑھاتے جا رہے ہیں...بڑھاتے جا رہے ہیں...اور ان کی اُمت میں اضافہ فرماتے جا رہے ہیں..اور ان کے ”عشاق و محبین“ کو....عشق و محبت کے جام پلاتے جا رہے ہیں.....

توجہ سے ”مجلس حضوری“ کرنے والے سچ بتائیں..کتنا سکون ملتا ہے؟...کتنا نور بھرتا ہے؟..اور کتنی زیادہ امید بڑھتی ہے؟..

..والحمدللہ رب العالمین..

دو دن سے ایک کتاب پڑھ رہا تھا..کتاب کا نام ہے....

”الجزاء الأوفیٰ فی ذکر اسماء المصطفٰی صلی اللہ علیہ وسلم “

کتاب کے مصنف..محقق و عاشق رسول عالم دین حضرت مولانا قاری غلام یاسین صاحب زیدہ قدرہ نے....اس کتاب میں..حضور اقدس صلی اللہ علیہ وسلم کے (833)”اسماء مبارکہ “جمع فرما دیے ہیں..بہت مبارک، جامع اور مفید کتاب ہے..عنقریب ”مکتبہ عرفان لاہور“ سے دوبارہ شائع ہو رہی ہے..کوشش کریں کہ ضرور آپ کے گھر میں ہو..اور آپ کے مطالعہ میں آئے..آپ صلی اللہ علیہ وسلم کے اتنے سارے ”اسماء گرامی“ جمع کرنا....اور ان کی تشریح کرنا..کوئی معمولی کام نہیں..بڑی محنت اور عظیم سعادت ہے..میں اس کتاب میں سے آپ صلی اللہ علیہ وسلم کے چند اسماء گرامی....لکھ رہا ہوں..ممکن ہے ان کے فیض سے..جہاد کے کسی منکر یا مخالف کو سچی توبہ کی توفیق مل جائے..

① سیدنا ”ذی الجہاد“ صلی اللہ علیہ وسلم... جہاد والے نبی..

② سیدنا ”ذِی السَّیف“ صلی اللہ علیہ وسلم..تلوار والے نبی..

③ سیدنا ”رّسُول المَلَاحِم“ صلی اللہ علیہ وسلم.. گھمسان کی جنگوں والے رسول...

④ سیدنا ”سَیف اللہ المسلول“ صلی اللہ علیہ وسلم.. اللہ تعالی کی سونتی ہوئی تلوار..

⑤ سیدنا ”الضَحّاکِ“صلی اللہ علیہ وسلم...جنگ میں بہادری کے ساتھ دشمن کا خون بہانے والے...

ایسے اور بھی ”اسماء گرامی“ ہیں..اللہ تعالی ہمیں اپنے نبی صلی اللہ علیہ وسلم کے تمام اخلاق.....اپنانے کی توفیق عطاء فرمائیں...وہ معافی ہو یا قتال..مسواک ہو یا تلوار..

مغرب سے جمعہ شریف، مقابلہ حسن مرحبا!

والسلام

خادم.....لااله الاالله محمد رسول الله

بسم اللہ الرحمن الرحیم

<مکتوب خادم>

محبوبانہ عبادت

السلام علیکم ورحمة اللہ وبرکاته....

اللہ تعالی ”اُمتِ حضرت محمد صلی اللہ علیہ والہ وسلم“ کی..اور ”حرمین شریفین“ کی حفاظت فرمائیں..

① مکہ مکرمہ پر ڈرون حملے کی کوشش سے..ہر سچے مسلمان کو سخت، ذہنی اور قلبی صدمہ پہنچا ہے..قاتل ”حوثیوں “کی تباہی و بربادی کا وقت قریب ہے ان شاء اللہ انہوں نے اپنے ”زوال“ کو آواز دے دی ہے...

② الحمدللہ ”المؤمنات“ کا ”دورہ تزکیہ“..مبارک اور پرنور رہا..شریک ہونے والی بعض بہنوں کے تاثرات شائع کر دیے گئے ہیں..ضرور پڑھ لیں..مدینہ مدینہ...محبت بھرا نام..③ گزشتہ تین دنوں سے اللہ تعالی کی بڑی رحمت برس رہی ہے کہ روزانہ ہی کوئی ”غیر مسلم“....اسلام قبول کر کے..ہمارا دینی، اسلامی، قلبی بھائی بن رہا ہے...اس پر اللہ تعالی کا جتنا شکر ادا کریں کم ہے...

④ جمعہ کی رات اور دن...صلوٰۃ و سلام کی کثرت کا ”مقابلہ حسن“ ماشاءاللہ..دیگر ممالک میں بھی پھیلتا جا رہا ہے...الحمدللہ اس مقابلہ کی کارگزاریاں..کروڑوں، اربوں تک ہوتی ہیں..دل بہت خوش ہوتا ہے..مگر ”صلوٰۃ و سلام“ ایسی ”محبوبانہ عبادت“ ہے کہ..جتنی بھی ہو جائے کم لگتی ہے..سوچیں تو سہی کہ اس میں ہم کس سے مانگتے ہیں؟ کس کے لیے مانگتے ہیں؟ اور کیا مانگتے ہیں؟..سوچ کر ہی جان فدا ہونے لگتی ہے...

⑤ حضرت شیخ الحدیث مولانا محمد زکریا صاحب نور اللہ مرقدہ سے جب کوئی عرض کرتا کہ..حضرت کوئی خاص نصیحت فرمائیں..تو آپ فرماتے..میرے پیارے بس دو باتوں کی نصیحت ہے..ایک تو موت کو ہمیشہ یاد رکھو..اور دوسرا جس قدر زیادہ ہو سکے حضرت آقا محمد مدنی صلی اللہ علیہ وسلم پر ”صلوٰۃ و سلام“ کی کثرت کرو..جو مسئلہ ہو، جو پریشانی ہو بس ”صلوٰۃ و سلام“ بڑھا دو...حضرت کی یہ دونوں نصیحتیں بڑی قیمتی ہیں..جماعت کی خوش نصیبی دیکھیں کہ..”مجلس حضوری“ مل گئی..ماشاءاللہ لا قوۃ الا باللہ..مجلس حضوری میں جب گم ہوں تو دل چاہتا ہے اسی حالت میں جان نکل جائے...

کوشش کیا کریں کہ..جب جمعہ کی رات شروع ہو..جمعہ کا دن شروع ہو..جمعہ کا دن رخصت ہو تو ان تین اوقات میں ہم ”صلوٰۃ و سلام“ پڑھ رہے ہوں..رات شروع ہوتی ہے سورج غروب کے وقت..دن شروع ہوتا ہے فجر کی نماز کا وقت داخل ہونے پر..اور ختم ہوتا ہے سورج غروب کے وقت..مغرب سے جمعہ شریف، مقابلہ حسن مرحبا!

والسلام

خادم.....لااله الاالله محمد رسول الله