مکتوبات: 2023

2023

بسم اللہ الرحمٰن الرحیم

آغاز مکتوبات… 2023ء

۱۴۴۴…۱۴۴۵ھ

ماہ (۱) جنوری

اَللّٰهُمَّ بَارِکْ لَنَا

اللہ تعالیٰ… ہمیں ’’یقین‘‘ کی ’’نعمت‘‘ نصیب فرمائیں… اللہ تعالیٰ پر یقین… اللہ تعالیٰ کے وعدوں پر یقین… اللہ تعالیٰ کی کتابوں، رسولوں، فرشتوں اور آخرت پر یقین… مکمل اطمینان۔

آج اتوار کا دن ہے… ۲۹ /جمادی الآخر ۱۴۴۴ھ کی تاریخ ہے… جنوری کا مہینہ… 22 تاریخ… 2023 ہے۔

آج مغرب کے بعد ’’چاند‘‘ نظر آ گیا تو ’’رجب شریف‘‘ شروع ہو جائے گا… سال کا ساتواں مہینہ… حرمت و احترام والے چار مہینوں میں سے دوسرا مہینہ… معراج مبارک اور نماز کا مہینہ… روحانی بلندی اور استغفار کا مہینہ… رزق کی بوچھاڑ… اور جہاد کی تیاری کا مہینہ… رمضان المبارک کی پہلی خوشبو امت تک پہنچانے والامہینہ… چاند کی خبروں پر نظر رکھیں… دعاؤں اور معمولات کا اہتمام کریں۔

اَللّٰهُمَّ بَارِکْ لَنَا فِيْ رَجَبَ وَشَعْبَانَ وَبَلِّغْنَا رَمَضَانَ۔

’’رجب المرجب‘‘ کا ایک خاص استغفار بھی… اسلاف سے منقول ہے… چاند ہو گیا تو عرض کر دیں گے ان شاءاللہ۔

22/01/2023

رجب کی بلندیاں

اللہ تعالیٰ نے حضرت محمدصلی اللہ علیہ وسلم کو… ’’اسراء‘‘ اور ’’معراج‘‘ سے سرفراز فرمایا… مسجد الحرام سے مسجد الاقصیٰ تک… اور پھر وہاں سے اوپر آسمانوں اور بلندیوں تک… یہ واقعہ ’’رجب‘‘ کے بابرکت مہینے میں پیش آیا… اسلام میں ہجرت کے عظیم عمل کا آغاز بھی ’’رجب‘‘ میں ہوا… جب ’’حبشہ‘‘ کی طرف پہلی ہجرت ہوئی… اور اسلامی غزوات میں سے سب سے بڑا غزوہ… ’’غزوہ تبوک‘‘ بھی رجب میں ہوا… اس ’’غزوہ‘‘ نے دنیا کے سیاسی اور عسکری نظام کو بدل دیا… مسلمانوں کے عالمی طاقت بننے کا آغاز فراہم کیا… اور ’’روم‘‘ کی سپرپاور کے رعب کو توڑ ڈالا… اس غزوہ سے پہلے بہت سے علاقے، ملک اور قبائل… ’’روم‘‘ کے نیچے صرف اس لئے لگے ہوئے تھے کہ وہ… روم کو ناقابل شکست سمجھتے تھے… وہ ’’سلطنت روم‘‘ کو ٹیکس اور خراج دیتے تھے اور اس کے ناجائز مطالبات مانتے تھے اور سمجھتے تھے کہ… اگر ہم نے ایسا نہ کیا تو ہم ختم ہو جائیں گے… غزوہ تبوک نے ان کے لئے آزادی کی ہوا چلا دی اور وہ جان گئے کہ دنیا میں صرف روم ہی نہیں ہے… مسلمانوں کی بڑی قوت روم کا مقابلہ کرنے کو موجود ہے… یہ غزوہ مسلمانوں کی افرادی قوت، تیاری اور عسکری حکمت عملی کے لحاظ سے سب سے بڑا غزوہ ہے… جبکہ فضیلت اور مقام میں ’’غزوہ بدر‘‘ سب سے بڑا غزوہ ہے… رجب کے مبارک مہینے میں ہی مسلمانوں نے حضرت سلطان صلاح الدین ایوبی رحمہ اللہ تعالیٰ کی قیادت میں… یورپ کی ستر سلطنتوں کی طاقت کو شکست دے کر مسجد اقصٰی واپس آزاد کرائی… رجب استغفار کا مہینہ ہے… اسلاف سے رجب کے لئے… استغفار کا ایک صیغہ منقول ہے… جو یہ سات بار پڑھے… ان شاء اللہ بڑی مغفرت اور بخشش کا ذریعہ ہے… صیغہ یہ ہے:

اَسْتَغْفِرُ اللّٰهَ الْعَظِيْمَ الَّذِيْ لَا اِلٰهَ اِلَّا هُوَ الْحَيُّ الْقَيُّوْمُ وَاَتُوْبُ اِلَيْهِ تَوْبَةَ عَبْدٍ ظَالِمٍ لِّنَفْسِهٖ لَا يَمْلِكُ لِنَفْسِهٖ مَوْتًا وَّلَا حَيَاةً وَّلَا نُشُوْرًا۔

24/01/2023

ماہ (2) فروری

کٓھٰیٰعٓصٓ… حٰمٓ عٓسٓقٓ

اللہ تعالیٰ سے اچھی امید رکھنا… اچھے حالات کے انتظار میں رہنا ’’عبادت‘‘ ہے:

’’نَصْرٌ مِّنَ اللهِ وَفَتْحٌ قَرِيْبٌ۔‘‘

اللہ تعالیٰ سے ناامید ہونا… مایوس ہونا جرم ہے… کبیرہ گناہ ہے:

’’لَا تَقْنَطُوْا مِنْ رَّحْـمَةِ اللهِ… وَلَا تَيْأَسُوْا مِنْ رَّوْحِ اللهِ۔‘‘

ایمان والوں سے اللہ تعالیٰ نے غلبے کا وعدہ فرمایا ہے:

’’وَاَنْتُمُ الْاَعْلَوْنَ اِنْ كُنْتُمْ مُّؤْمِنِيْنَ۔‘‘

یہ وعدہ سچا ہے… پکا ہے… مگر آزمائش آتی ہے… اندھیرے حملہ آور ہوتے ہیں… اُحد کے زخم… اور بیرمعونہ کے حالات بھی آتے ہیں… لیکن بالآخر فتح اسلام کی ہوتی ہے… مسلمان کی ہوتی ہے… سارے وعدے، ساری بشارتیں ان کے لئے ہیں جو راستے پر استقامت سے چلتے رہیں… منزل پر پہنچیں یا نہ پہنچیں… اللہ تعالیٰ کا راستہ ہی کامیابی کی بڑی منزل ہے… وعدہ ’’محنت‘‘ پر ہے… نظریہ پر ہے… نتیجے پر نہیں:

’’يُحِبُّهُمْ وَيُحِبُّوْنَهٗ۔‘‘

شہداء کرام کا خون ضائع نہیں جاتا… جو زمین شہداء کو قبر دیتی ہے… وہاں اسلام ضرور تخت نشین ہوتا ہے… دشمن زور دکھا کر تھک چکے… ہر سازش کا انجام سازشیوں کی ذلت پر ہوا… زمین اپنے نقشے بدلتی رہتی ہے… فرعون کی لاش ظلم والی طاقت کا انجام بتانے کے لئے موجود ہے… دین محمد صلی اللہ علیہ وسلم میں ’’جہاد‘‘ محبوب فریضہ ہے… شہداء کرام کی ارواح مسکراتی، اڑتی پھرتی ہیں… قرآن مجید میں… انفال و براءت ہمیشہ دمکتی ہیں… اللہ باقی… مخلوق فانی… پھر مایوسی کیسی؟… کشمیر آزاد ہوگا… ان شاءاللہ ضرور ہوگا… غزوہ ہند چمکے گا… زنجیریں کھنکھنائیں گی… اور تکبیر گونجے گی:

اللہ اکبر… اللہ اکبر… اللہ اکبر۔

05/02/2023

اِنَّ رَبِّىْ رَحِيْمٌ وَّدُوْدٌ‏

اللہ تعالیٰ ’’شام‘‘ اور ’’تُرکیہ‘‘ پر رحم و کرم فرمائیں… وہاں خوفناک زلزلے کی تباہی ہے… ہر مسلمان کو ان کے لئے ضرور دعاء کرنی چاہیے… اور بھی جو کچھ کر سکتے ہوں۔

مسلمانوں کے ایک دوسرے پر بڑے حقوق ہیں… زلزلے میں جو مسلمان شہید ہو گئے… ان کے لئے ایصال ثواب… زخمیوں کے لئے شفاء اور عافیت کی دعاء… بے گھر اور بے در افراد کے لئے اچھے ٹھکانے کی دعاء… جن کا سب کچھ ڈوب گیا ان کے لئے برکت اور وسعت کی دعاء… اور جو اپنوں کو کھو بیٹھے ان کے لئے صبر اور نعم البدل کی دعاء… اگر ہم یہ دعاء ان کا حق سمجھ کر کریں گے تو ایسی دعاء کا ان کو ضرور فائدہ پہنچے گا… اور ہمیں بھی ان شاء اللہ… ساتھ یہ دعاء بھی کریں کہ… اللہ تعالیٰ اہل کفر کے فتنے اور طاقت کو کمزور فرمائیں… درندوں جیسے دلوں والے یہ انسان نما جانور… اپنی طاقت اور حرص میں بہت آگے بڑھ گئے ہیں… ان کے دلوں میں اسلام اور مسلمانوں سے گہری دشمنی ہے… وہ اب موسموں سے بھی کھیلتے ہیں اور فطرت سے بھی… کچھ بعید نہیں کہ… مسلمانوں پر ٹوٹنے والی یہ موسمی اور ماحولیاتی آفات اسی بھیانک کھیل کا حصہ ہوں… بہرحال کچھ بھی ہو مسلمانوں کو نہ ڈرنے کی ضرورت ہے نہ گھبرانے کی… کفر کی طاقت کمزور ہوتی ہے… مسلمانوں کو جس دن مرکز مل گیا وہ تین صدیوں کا حساب اچھی طرح چکا دیں گے ان شاءاللہ… اسلام نے قائم رہنا ہے… مسلمانوں نے موجود رہنا ہے… یہ بات پکی ہے پتھر پر لکیر ہے… باقی سب آئے اور چلے گئے… کہاں ہیں منگول طاقت اور تاتاری طوفان؟… اور کہاں ہے سرخ انقلاب؟۔

ترکیہ اور شام کے مسلمانوں کے لئے دل غمگین اور اداس ہے… آئیے دعاء کا دامن پھیلاتے ہیں… ہمارا رب رحیم ہے، مہربان ودود ہے… بہت محبت فرمانے والااور جبار ہے ہر زخم کا مداوہ فرمانے والا… مغرب سے جمعہ شریف اور مقابلہ حسن مرحبا۔

09/02/2023

اَللّٰهُمَّ بَارِكْ لَنَا فِيْ شَعْبَانَ وَبَلِّغْنَا رَمَضَانَ

شعبان 1444ھ کی رؤیت ہلال ل گزشتہ شب حجاز وغیرہ میں ہوگئی… پاکستان میں اس کا اعلان آج رات ہو گا ان شاء اللہ… معمولات کی یاد دہانی ہے۔

21/02/2023

کوئی غلط فہمی میں نہ رہے

اللہ تعالیٰ مسلمانوں کی حفاظت فرمائیں… پاکستان کی حفاظت فرمائیں خصوصًا مشرکین کے شر سے۔

اللہ تعالیٰ کا فرمان ہے… اِنَّمَا الْمُشْرِکُوْنَ نَجَسٌ… کہ مشرک سراسر نجاست ہیں… ناپاک ہیں… انڈیا پر اس وقت پکے مشرکین کی حکومت ہے… آر ایس ایس والے… بی جے پی والے۔

انڈیا اس وقت… پاکستان پر تین طریقے سے حملہ آور ہے۔

۱وہ یہاں مسلسل دہشت گردی کرا رہا ہے… روزانہ لاشیں گرا رہا ہے… اس وقت بھی اس کے یہ منصوبے ہر شہر میں جاری ہیں۔

۲وہ یہاں کئی بااثر افراد کو اس بات پر قائل کر چکا ہے کہ جب تک پاکستان، ہندوستان کی دوستی نہیں ہوگی اس وقت تک پاکستان ترقی نہیں کرسکے گا… ایک بڑا میڈیا گروپ، ایک بڑی سیاسی پارٹی اور کئی گروہ اس پر کام کر رہے ہیں… حالانکہ اس دوستی کے پیچھے غلامی، ذلت اور تباہی ہے۔

۳ثقافتی یلغار کے ذریعے پاکستان میں موجود بددین، ملحد، لبرل اور غدّار افراد کو طاقت دینا… اسی سلسلے میں انڈیا کے ایک غلیظ شاعر… ’’جاوید اختر‘‘ کو لاہور بلایا گیا… ’’جاوید اختر‘‘ کے نام سے کوئی دھوکہ نہ کھائے… اس نے خود یہ اعلان بار بار کر رکھا ہے کہ وہ کسی دین کو نہیں مانتا… اللہ تعالیٰ کو نہیں مانتا… یعنی وہ کُھلا اور اعلانیہ کافر ہے… اس نے لاہور میں پاکستان کے خلاف تقریر کی… مجمع میں موجود سفید مونچھوں والے دانشور… اور سفید بالوں والی چڑیلیں اس کی تقریر پر تالیاں پیٹتی رہیں… وہ پاکستان جہاں آجکل اللہ تعالیٰ کے کسی وفادار مجاہد کو بیان دینے اور بات کرنے کی اجازت نہیں… وہاں ایک انڈین کافر… پورے ملک کو گالیاں دے کر چلا گیا۔

یہ صورتحال… کسی اچھی حالت کا اشارہ نہیں دے رہی… یہ مُلک ’’دو قومی‘‘ نظریئے پر وجود میں آیا… اور ’’لَا اِلٰہَ اِلَّا اللہ‘‘ کی بنیاد پر قائم ہوا… یہاں اس طرح کے کھلم کھلا کفر، الحاد اور غداری کی اجازت نہیں دی جا سکتی… دین کو دبانے اور الحاد کو اٹھانے کی نحوست ہے کہ ملک مہنگائی اور انتشار کا شکار ہے… دعاء کریں کہ پاکستان کو اچھے حکمران نصیب ہوں۔

باقی ایک بات واضح ہے کہ پاکستان کا دینی طبقہ… اتنا کمزور نہیں ہے جتنا کمزور سمجھ کر اُسے آئے دن دبایا جا رہا ہے… اچھا ہوگا کہ مزید برے وقت سے پہلے ہر کوئی اپنی غلط فہمی دور کر لے۔

24/02/2023

ماہ (۳) مارچ

موقع سے فائدہ اٹھائیں

اللہ تعالیٰ ہماری زندگی ’’قیمتی‘‘ بنائیں… ہمارے ہی جیسے انسان کتنے بڑے بڑے کام کر گئے… کسی کے نامۂ اعمال میں اسلامی فتوحات… علاقوں کے علاقے… ملکوں کے ملک… اسلام اور مسلمانوں کے لئے کسی علاقے کو فتح کرنا کتنا بڑا عمل ہے… کتنا قیمتی عمل ہے… سوچ کر رشک آتا ہے… کسی کے نامۂ اعمال میں لاکھوں، ہزاروں افراد کا اسلام قبول کرنا… کسی کے نامۂ اعمال میں بے شمار گناہگاروں کا تائب ہونا،اللہ تعالیٰ کا ولی بننا… کسی کے نامۂ اعمال میں دعوت الی اللہ کا وسیع کام… کسی کے نامۂ اعمال میں صبر، استقامت اور مظلومیت کے خزانے… کسی کے نامہ اعمال میں مساجد کی تعمیر،مدارس کا قیام اور خدمت خلق… کسی کے نامۂ اعمال میں اخلاص، عبادت، ریاضت اور آنسو… کسی کے نامۂ اعمال میں صدقات، خیرات اور حسنات کے انبار… اور کسی کے نامۂ اعمال میں خدمت قرآن، تفسیر قرآن، دعوت قرآن اور تعلیم قرآن۔

ہمارے ہی جیسے انسان زندگی قیمتی بنائی تو صدیق بن گئے… قیمتی زندگی قربان کر دی تو شہید بن گئے… زندگی کی آزادی اور خواہشات کو دبایا تو صالحین بن گئے… مگر بہت سے انسان زندگی ضائع بھی کر گئے… انہوں نے اللہ تعالیٰ کو بھلا دیا تو وہ خود کو بھول گئے… پلازے بناتے رہے… کتے نہلاتے رہے… عشق معشوقی کے چکر میں پڑے رہے… نہ اپنی قبر کے لئے کچھ بنایا نہ اپنی آخرت کے لئے کچھ کمایا… آج وہ قبروں میں پڑے دنیا میں واپس آکر نیکی کرنے کے وعدے کرتے ہیں… مگر اب ان کی نہیں سنی جاتی… اللہ تعالیٰ نے ہمیں زندگی قیمتی بنانے کا موقع عطاء فرمایا ہے… آج سے اسی سلسلے کی ایک مہم کا آغاز ہے… اللہ تعالیٰ دیکھ رہے ہیں… اللہ تعالی سن رہے ہیں… نامۂ اعمال ابھی لکھا جا رہا ہے… اس کی سیاہی کو مٹانے اور اس کی روشنی کو بڑھانے کا وقت موجود ہے… اللہ تعالیٰ مجھے اور آپ سب کو توفیق عطاء فرمائیں۔

رَبِّ اشْرَحْ لِیْ صَدْرِیْ وَ یَسِّرْ لِیْ ۤ اَمْرِیْ۔

15/3/2023

مرحبا، مرحبا، مرحبا رمضان ۱۴۴۴ھ

اللہ تعالیٰ کے تمام ’’اسماء الحسنیٰ‘‘ کے وسیلے سے دعاء ہے کہ… اللہ تعالیٰ مجھے اور آپ سب کو مغفرت، رحمت، عافیت اور فیوضات و برکات والارمضان المبارک نصیب فرمائیں۔

حجاز وغیرہ میں آج مغرب سے ’’رمضان المبارک‘‘ کا آغاز ہے… اللہ کرے یہاں بھی ہو جائے… اور روزہ اپنی ذاتی آنکھوں کے اعتبار سے نہ بلکہ اللہ تعالیٰ کے نکالے ہوئے ’’چاند‘‘ کی شرعی رؤیت سے ہو… بہرحال چاند رات کے معمولات اور استقبال رمضان کا ذوق و شوق سے اہتمام رہے۔

باقی جہاں جیسے ’’اعلان‘‘ ہو اسی کے اعتبار سے چلیں… امت سے کٹ کر الگ راہ اختیار نہ کریں… دل کی تمنا اپنی جگہ مگر مسلمانوں میں ’’اجتماعیت‘‘ زیادہ مقدم ہے۔

موبائل کو الوداع کہیں… صرف ایک ماہ… ہر طرح کی ویڈیو بنانے، چلانے، دیکھنے، دکھانے سے بچ گئے تو پھر اپنے محبوب رب تعالیٰ سے مناجات، عبادت، تلاوت، دعوت اور خدمت کا کھلا وقت ملے گا اور… دل بھی سیدھا رہے گا ان شاءاللہ۔

22/3/2023

اَلْحَمْدُ لِلهِ وَالشُّكْرُ لِلهِ عَلٰى رَمَضَانَ

اللہ تعالیٰ کا شکر… رمضان المبارک نصیب ہونے پر:

اَلْحَمْدُ لِلهِ رَبِّ الْعَالَمِيْنَ (پانچ بار)

اَلْحَمْدُ لِلهِ كَثِيْراً (پانچ بار)

اَلْحَمْدُ لِلهِ اَبَداً (پانچ بار)

اَللّٰہُمَّ لَکَ الْحَمْدُ عَدَدَ عَفْوِكَ عَنْ خَلْقِكَ (پانچ بار)

اَللّٰهُمَّ لَكَ الْحَمْدُ اَضْعَافَ مَا سَبَّحَكَ جَمِيْعُ خَلْقِكَ (پانچ بار)

اَلْحَمْدُ لِلهِ الَّذِىْ خَلَقَنِيْ وَلَمْ اَكُ شَيْئًا، وَالْحَمْدُ لِلهِ الَّذِىْ عَلَّمَنِىْ وَلَمْ اَعْلَمْ شَيْئًا، وَالْحَمْدُ لِلهِ الَّذِىْ رَزَقَنِىْ وَلَمْ اَمْلِكْ شَيْئًا (پانچ بار)

ایک رمضان ملنا ایسا ہے جیسا کہ… انسان کی عمر میں ’’ستّر سال‘‘ کا اضافہ ہوگیا… کیونکہ زندگی کا مقصد کھانا پینا نہیں۔

وہ تو آخرت میں ہوگا… جنت میں ہوگا… زندگی کا مقصد ہے ایمان اور اعمال صالحہ… یعنی اللہ تعالیٰ کی رضا اور آخرت کے لئے اعمال کا ذخیرہ… رمضان المبارک میں ہر عمل کم از کم ستر گنا بڑھ جاتا ہے… اور اگر لیلۃ القدر نصیب ہوئی تو تراسی سال اور بڑھ گئے… اللہ کرے مجھے اور آپ سب کو ایمان اور عمل صالح کی دُھن نصیب ہو جائے… تب معلوم ہوگا کہ یہ حساب کتاب… مثلا ستر سال،تراسی سال صرف ترغیب دینے کے لئے ہے… ورنہ رمضان کے انعامات اور پیکج اس سے بھی بڑے ہیں… محبوب مقدس حضرت محمد صلی اللہ علیہ وسلم کی امت پر اللہ تعالیٰ کا احسان کہ اسے ایسے قیمتی ایام، اوقات اور اعمال نصیب فرما دیئے کہ… زیادہ جینا بھی نہ پڑے اور اعمال صدیوں کے جمع ہوجائیں… اس فانی دنیا میں زیادہ جینا بھی تو کوئی آسان کام نہیں ہے۔

ہو سکے تو ’’شہر رمضان‘‘ کتاب کا مطالعہ فرمالیں… اس میں ’’اصحاب رمضان‘‘ کے صدیوں کے تجربات کا خلاصہ آ گیا ہے… اللہ تعالیٰ سمجھنے اور عمل کرنے کی توفیق عطاء فرمائیں۔

مغرب سے جمعہ شریف اور مقابلہ حسن مرحبا۔

23/03/2023

مقاماتِ کمال

اللہ تعالیٰ ’’درجات کمال‘‘ مزید بلند فرمائیں حضرت بی بی صاحبہ السیدہ، الطاہرہ، الصدیقہ، البتول، الزہراء، الرضیہ، فاطمہ، الطیبہ رضی اللہ عنھاکے۔

ان کی شان بہت بلند ہے… یقینا وہ بنی نوع انسان کا شرف بھی ہیں اور فخر بھی… اللہ تعالیٰ نے اولاد آدم علیہ السلام کو جو تکریم اور عزت عطاء فرمائی ہے… اسے اگر آسانی سے سمجھنا ہو تو… حضرت سیدہ فاطمۃ الزہراء رضی اللہ عنھاکے مقام و عزت و اکرام کو دیکھ لیں۔

سُبْحَانَ اللہِ وَبِحَمْدِہٖ سُبْحَانَ اللہِ الْعَظِیْمِ۔

دنیا میں اتنا مختصر قیام… مگر فضائل، مناقب اور رفعتوں کے پہاڑ اورسمندر… حضرت بی بی صاحبہ کی سیرت کا ایک ایک باب… بلکہ ایک ایک جملہ انسان کی زندگی بدل دیتا ہے اور دل کو نور و انوارات سے بھر دیتا ہے… مسلمان خواتین اگر واقعی ’’المؤمنات‘‘ بننا چاہتی ہیں تو انہیں … سیدۃ نساء الجنۃ، سیدۃ نساء العالمین حضرت سیدہ فاطمہ الزہراء رضی اللہ عنھا کی سیرت طیبہ کو عمل کی نیت سے پڑھنا چاہیے… وہ اس روئے زمین کی افضل ترین ،اعلی ترین اور کامیاب ترین ہستیوں میں سے ہیں… وہ روحانیت کے مقامات کی ’’ملکہ معظمہ مطہرہ‘‘ ہیں… ان کی سیرت اور تعلیمات میں ہر روحانی مرض کا علاج موجود ہے… وہ دنیا میں بھی کامیاب ترین رہیں اور آخرت میں تو ان کے عالی مقام کے کیا کہنے… کوئی کہے گا کہ جسم مبارک پر مشکیزے کے نشانات اور ہاتھوں پر چکی پیسنے کے چھالے… کیا یہی دنیا میں کامیابی ہے؟

یہی راز سمجھنے کے لئے تو عرض کیا ہے کہ ان کی سیرت مبارکہ پڑھیں… تاکہ بہت سے دھوکے مٹ جائیں اور وہ منظر دل پر نقش ہو جائے کہ… حضرت آقا مدنی صلی اللہ علیہ وسلم سفر جہاد سے واپسی پر اپنے گھر تشریف لے جانے سے پہلے… ان کے گھر تشریف لے جاتے اور ملاقات فرماتے۔

حضرت سیدہ فاطمہ رضی اللہ عنھا کی خاص صفات میں… ان کی والہانہ سخاوت بھی شامل ہے… عجیب و غریب قصے اور احوال اس باب میں ان سے صادر ہوئے… آئیے آج تین رمضان المبارک… جوکہ حضرت سیدہ بی بی صاحبہ کا یوم وفات ہے… ان کے ایصال ثواب کے لئے زیادہ سے زیادہ مال اللہ تعالیٰ کے راستے میں پیش کرنے کی سعادت حاصل کریں۔

25/03/2023

اہل محبت کو یاد رکھیں

اللہ تعالیٰ نے جسے بھی ’’زندگی‘‘ عطاء فرمائی ہے اسے ’’موت‘‘ بھی ضرور عطاء فرماتا ہے… جس طرح ’’زندگی‘‘ ایک ’’حقیقت‘‘ ہے اسی طرح ’’موت‘‘ بھی ایک ’’حقیقت‘‘ ہے… سمجھنے کی بات یہ ہے کہ ’’موت‘‘ خاتمہ نہیں ہے بلکہ ایک اور جہان اور مرحلے کا ’’آغاز‘‘ ہے… اگر ’’موت‘‘ خاتمہ ہوتا تو پھر بار بار عذاب قبر سے حفاظت کی دعاء کیوں مانگی جاتی ہے؟… بعض ائمہ کے نزدیک تو ہر نماز کے آخری قعدے کے آخری حصے میں ’’عذاب قبر‘‘ سے پناہ مانگنا واجب ہے… معلوم ہوا کہ بڑا اہم معاملہ ہے اور بلکل یقینی ہے… اب سوچنے کی بات یہ ہے کہ میری اور آپ کی ’’قبر‘‘ کہاں بنے گی اور اس قبر کے اندر کا ماحول کیا ہوگا؟

اہل ایمان اپنی قبر کی بہت فکر رکھتے ہیں… دنیا کے ذاتی گھر اور یہاں کی رہائش سے زیادہ قبر کو بہتر بنانے کا سوچتے ہیں… یہاں والاگھر تو دوسروں کو مل جائے گا… جب کہ ’’قبر‘‘ میں قیامت تک رہنا ہے… اور قبر میں عذاب بھی ہے اور رحمت بھی،آگ بھی ہے اور نعمت بھی،ذلت بھی ہے اور عزت بھی،تنگی بھی ہے اور فراخی بھی… قبر ایک پورا جہان ہے ہمارے اس جہان سے بڑا… اللہ تعالیٰ ہمیں توفیق عطاء فرمائیں کہ ہم اپنی قبر کے لئے بھرپور تیاری کرکے جائیں… اور ایسے اعمال، کردار، اخلاق اور خدمات چھوڑ جائیں کہ قبر میں بھی ان کا نفع پہنچتا رہے… پھر ایمان کی برکت سے مسلمانوں کو مرنے کے بعد دوسرے مسلمانوں کے ’’ایصال ثواب‘‘ سے بھی فائدہ پہنچتا ہے… مگر ایصال ثواب کا مسئلہ کافی تفصیل طلب ہے… کون سا عمل اور ثواب میت کو پہنچتا ہے اور کونسا نہیں؟… ایصال ثواب کس طرح کرنا چاہیے؟… ایصال ثواب کی جائز صورتیں کون سی ہیں؟… اور ناجائز طریقے کونسے سے؟

کوشش رہے گی ’’ان شاءاللہ‘‘ کہ اس موضوع کا کچھ خلاصہ ’’مکتوبات‘‘ میں آجائے… آج صرف اتنا سمجھ لیں کہ مالی صدقہ اور خیرات وہ عمل ہے جس کا ایصال ثواب سب سے زیادہ مفید ہے… اور اس کے جائز اور مفید ہونے پر امت کا اتفاق ہے… اللہ تعاٰلی ہم سب کو اپنے وفات پا جانے والے محبوبین کے لئے اس کی زیادہ سے زیادہ توفیق عطاء فرمائیں… اور ہمارے مرنے کے بعد ہمارے بعد والوں کو ہمارے لئے اس عمل کی زیادہ سے زیادہ توفیق عطاء فرمائیں۔

26/03/2023

میٹھے جاری چشمے

اللہ تعالیٰ ’’الواسع‘‘ ہیں ’’الباسط‘‘ ہیں… اللہ تعالیٰ کا نظام بہت وسیع ہے… کئی لوگ ’’زندہ‘‘ ہوتے ہیں مگر ان کی نیکیاں کم ہوتی ہیں… پھر جب وہ مر جاتے ہیں ان کی نیکیوں میں اتنا اضافہ ہوتا ہے کہ پہاڑوں سے بھی زیادہ… اور یہ اضافہ ہوتا ہی چلا جاتا ہے… جبکہ بہت سے لوگ زندگی میں نیکی کرتے رہتے ہیں مگر ان کے مرنے کے بعد ان کی نیکیاں بند ہو جاتی ہیں یا بہت کم ہو جاتی ہیں… یہی حال گناہوں کا بھی ہے… بعض لوگوں کے مرتے ہی ان کے گناہ بھی بند ہوجاتے ہیں… جبکہ بعض لوگوں کے مرنے کے بعد ان کے گناہ اور زیادہ بڑھ جاتے ہیں اور بڑھتے ہی جاتے ہیں… مرزا قادیانی ملعون کو ہی دیکھ لیں! اس کے گناہ اس کے مرنے کے بعد کتنی تیزی سے بڑھ رہے ہیں… اس لئے ضروری ہے کہ زندگی سوچ سمجھ کر گزاری جائے… کیونکہ مرنے کے بعد بھی انسان کے بہت سے کھاتے چلتے رہتے ہیں… اب جن لوگوں کو یہ فکر ہوتی ہے کہ ہمارے مرنے کے بعد بھی ہماری نیکیاں جاری رہیں وہ اس کے لئے بہت کوشش، فکر اور منصوبہ بندی کرتے ہیں… اس بارے میں عجیب و غریب واقعات ماضی میں ہمارے سامنے موجود ہیں… حضرات صحابہ کرام رضوان اللہ تعالیٰ علیہم اجمعین کے صدقات جاریہ تو قیامت تک کے ہیں… جب تک اسلام اور مسلمان موجود ہیں ان کے اجر میں حضرات صحابہ کرام رضوان اللہ تعالیٰ علیہم اجمعین بھی شریک ہیں… مگر اس کے باوجود انہوں نے اپنی نیکیوں کو جاری رکھنے کے لئے طرح طرح کے منصوبے شروع فرمائے… کئی صحابہ کرام رضوان اللہ تعالیٰ علیہم اجمعین نے اپنی جائیدادوں کو دین کے اور مسلمانوں کے مختلف کاموں کے لئے وقف کیا… اور پھر ان کا یہ ذوق امت میں جاری ہوگیا… ایسا بھی وقت آیا کہ پورے ملک کی اکثر جاگیریں اور جائیدادیں اللہ تعالیٰ کے لئے وقف ہوتی تھیں… کتنے مزے کی بات ہے کہ جائیداد اللہ تعالیٰ کے لئے وقف ہو گئی… اور حصے طئے ہوگئے کہ اس کی آمدن میں سے اتنا میرے غریب رشتہ داروں کو ملے گا ، اتنا جہاد میں دیا جائے گا، اتنا مساجد کی تعمیر کے لئے ہوگا، اس میں سے ہر سال میرے لئے ایک حج اور دو بار عمرہ کرایا جائے گا، اس سے ہر سال اتنے قرآن مجید چھاپے اور تقسیم کئے جائیں گے،اور اتنا مال بھوکوں کو کھانا کھلانے کے لئے ہوگا… وغیرہ وغیرہ۔

یہ تو بس ایک مثال ہے… ماضی کے مسلمانوں کے اوقاف، ان کی مالیت اور ان کی تقسیم کے واقعات لکھوں تو آپ حیران رہ جائیں گے… بس فکر ہو کہ مرنے کے بعد اعمال صالحہ جاری رہیں تو پھر اللہ تعالیٰ بہت سے راستے اور اسباب عطاء فرما دیتے ہیں… کیونکہ سب کچھ اللہ تعالیٰ کا ہے زمین بھی، آسمان بھی،دنیا بھی اور آخرت بھی۔

28.03.2023

حیرت انگیز زندگی کا راز

اللہ تعالیٰ ’’قساوت قلب‘‘ سے ہماری حفاظت فرمائیں۔

’’قساوت قلب‘‘ یعنی ’’دل کی سختی، خرابی، زنگ آلودگی‘‘ ایک خطرناک ’’روحانی بیماری‘‘ ہے… جس کا قرآن مجید میں تذکرہ آیا ہے… دل کا سخت ہو جانا، بے لچک ہو جانا،اندھا بہرا ہو جانا، بے سمجھ ہو جانا… پھر نہ قرآن مجید کی آیات سن کر رونا آتا ہے نہ کوئی اثر ہوتا ہے، نہ اپنے گناہوں پر ندامت رہتی ہے اور نہ قبرستان میں جاکر اپنی موت کا خیال آتا ہے… غفلت ہی غفلت، دل میں نجاست ہی نجاست، زنگ ہی زنگ… اللہ تعالیٰ سمجھاتے ہیں کہ… ہلاکت ہے ان کے لئے جن کے دلوں پر قساوت چھا گئی ہو کہ اللہ تعالیٰ کی یاد سے گداز ہی نہیں ہوتے… اللہ تعالیٰ معاف فرمائے آجکل یہ مرض عام ہو چکا ہے… اسی لئے دین کی کوئی بات اثر نہیں کرتی… مسلمان، مسلمان پر ظلم ڈھاتا ہے… مسلمان، مسلمان کو لوٹتا ہے مارتا ہے… مہنگائی، ملاوٹ، ناپ تول میں کمی، چوری، خیانت، موت سے بے فکری اور موت کی تیاری سے بے فکری۔

دل کی قساوت کا ایک مؤثر علاج… زیادہ سے زیادہ صدقہ دینا ہے، اللہ تعالیٰ کی راہ میں خرچ کرنا ہے… چونکہ دل کی قساوت ایک جہنمی بیماری ہے اس لئے اسے مٹانے کے لئے جتنی بھی تکلیف ہو گوارہ کریں… اور زیادہ سے زیادہ مال اللہ تعالیٰ کی رضا کے لئے خرچ کریں… دو فیصد، پانچ فیصد اور بیس فیصد کے حساب سے نکل کر آدھا مال،دو تہائی مال اور ایک تہائی مال خرچ کرنے والے بنیں… تب آپ ایک نئی زندگی پائیں گے، ایک نیا جہان دیکھیں گے… وہ زندگی اور جہان جس کا مال کے لالچی اور بخیل انسان خواب میں بھی تصور نہیں کر سکتے… زیادہ مال دینے والوں کے مال میں کوئی کمی نہیں آتی بلکہ وہ دل کے بادشاہ بن جاتے ہیں،مضبوط دل، نرم گداز دل، کامیاب انسان اور زمین پر اللہ تعالیٰ کی نعمتیں تقسیم کرنے والے انسان۔

یہ جو کچھ لکھا ہے… بالکل یقینی ہے… کامیاب اور اعلیٰ زندگی کا یہ راز قرآن مجید میں کئی جگہ مذکورہے… خصوصا سورہ ’’الحدید‘‘ میں… دل چاہیے تو سمجھ کر پڑھ لیں۔

29/03/2023

افطار کے وقت کی ایک دعاء

اللہ تعالیٰ ’’اَلْعَظِیْم‘‘ ہیں:

’’وَھُوَ الْعَلِّیُ الْعَظِیْمُ۔‘‘

العظیم… سب سے زیادہ عظمت والے، بہت بڑے… ہمارے وہم و گمان سے بھی بڑے۔

’’افطار‘‘ کے وقت کی ایک دعاء بعض محدثین کرام نے لکھی ہے اور اس کی فضیلت یہ بیان فرمائی ہے کہ… جو مسلمان رمضان میں افطار کے وقت یہ دعاء پڑھ لے اس کے سارے گناہ معاف ہوجاتے ہیں… اس کے بڑے بڑے گناہ بخش دیئے جاتے ہیں… اور وہ گناہوں سے پاک صاف ہو جاتا ہے… روایت میں آیا ہے کہ اس دعاء کے کلمات اپنے بعد والوں کو سکھاؤ… کیونکہ ان کلمات سے اللہ تعالیٰ محبت فرماتے ہیں… اور رسول کریم صلی اللہ علیہ وسلم بھی ان کلمات سے محبت فرماتے ہیں… اور ان کلمات کی برکت سے دنیا اور آخرت کے معاملات سدھر جاتے ہیں۔

(ابن عساکر فی تاریخ مدینۃ دمشق)

افطار سے قبل پڑھی جانے والی دعاء کے کلمات یہ ہیں:

’’یَاعَظِيْمُ! يَاعَظِيْمُ! أَنْتَ إِلٰهِيْ لَا إِلٰهَ غَيْرُكَ، اِغْفِرِ الذَّنْبَ الْعَظِيْمَ فَإِنَّهٗ لَا يَغْفِرُ الذَّنْبَ الْعَظِيْمَ إِلَّا الْعَظِيْمُ۔‘‘

ترجمہ:’’اے بے انتہا عظمت والے! اے بےحد عظمت والے! آپ میرے معبود ہیں آپ کے سوا کوئی معبود نہیں،آپ بڑے گناہوں کو بخش دیجئے بے شک بڑے گناہوں کو آپ عظمت والے کے سوا کوئی نہیں بخش سکتا۔‘‘

افطار کے وقت ایک بار… یا زیادہ بار اس دعاء کو توجہ سے مانگ لیا جائے… اور ساتھ اول و آخر درود شریف بھی پڑھ لیا جائے… افطار کے علاوہ ویسے بھی ان کلمات کو پڑھتے رہنا چاہیے… اس لئے اچھا ہوگا کہ تھوڑی سی محنت کرکے یہ دعاء یاد کر لیں۔

مغرب سے جمعہ شریف اور مقابلہ حسن مرحبا۔

30/03/2023

ماہ (۴) اپریل

دوستوں سے باتیں

اللہ تعالیٰ کا شکر… ایمان پر، قرآن پر، رمضان پر… اَلْحَمْدُلِلہِ رَبِّ الْعَالَمِیْنَ۔

آپ میں سے جو ماشاءاللہ صحت مند ہیںروزے رکھ رہے ہیں، تلاوت کر رہے ہیں، مہم میں محنت کر رہے ہیں… ان سب کو مبارک باد… وہ ان نعمتوں کے زوال سے اللہ تعالیٰ کی پناہ مانگا کریں اور نعمتوں کے برقرار رہنے کے لئے… مَاشَاءَ اللہُ لَاقُوَّۃَ اِلَّا بَاللہِ… پڑھا کریں… اور ہر نیکی کے بعد اللہ تعالیٰ کا شکر ادا کیا کریں… یا اللہ آج کے روزے کا شکر، آج کی پانچ نمازیں مسجد میں نصیب ہوئیں ان کا شکر، آج اتنے پارے تلاوت ہوئے اس کا شکر،آج دین کا اتنا کام نصیب ہوا اس کا شکر… وغیرہ وغیرہ… اللہ تعالیٰ کی نعمتیں بے شمار ہیں۔

کتاب ’’ربیع الأبرار‘‘ میں علامہ ابو القاسم رحمہ اللہ لکھتے ہیں:

’’بنی اسرائیل چھ سو سال تک ان کلمات کی برکت سے عذاب سے محفوظ رہے:

’’مَاشَاءَ اللہُ، لَا حَوْلَ وَلَا قُوَّۃَ اِلَّا بِاللہِ، حَسْبُنَا اللہُ وَ نِعْمَ الْوَکِیْلُ۔‘‘

آپ میں سے جو بیمار ہیں… ان سب کی اس تحریر کے ذریعے ’’عیادت‘‘ ہے… اللہ تعالیٰ آپ کو اس بیماری کا اجر عطاء فرمائیں اسے آپ کے لئے ’’طہور‘‘ بنائیں اور آپ کو صحت و شفا اور عافیت عطاء فرمائیں… روزانہ ایک سو بار ’’معوذتین‘‘ (سورہ الفلق اور الناس) کا اہتمام کریں… اگر کمزوری ہے تو ’’آیۃ الکرسی‘‘ روز اکیس یا ستر بار پڑھیں… بے چینی ہے تو ’’اَللہُ اَللہُ رَبِّیْ لَا اُشْرِکُ بِہٖ شَیْئًا‘‘ کا ورد کریں… گھٹن، تکلیف، پریشانی ہے تو ’’ لَا اِلٰهَ اِلَّا اَنْتَ سُبْحَانَكَ اِنِّيْ كُنْتُ مِنَ الظَّالِمِيْنَ‘‘ روزانہ تین سو بار پڑھیں… اگر کھانے پینے میں تکلیف ہے تو سورہ ’’القریش‘‘ کھانے سے پہلے یا بعد میں گیارہ بار پڑھ لیا کریں… آپ میں سے جو مالدار ہیں اور جن کی ضروریات پوری ہیں وہ اس نعمت پر اللہ تعالیٰ کا شکر روز صبح شام ادا کیا کریں… اپنے مال میں سے اللہ تعالیٰ کے لئے بھی خرچ کیا کریں… اور اپنے سے زیادہ مال والوں سے حسد نہ کیا کریں اور نہ ان کی طرف دیکھا کریں… صبح و شام تین تین بار ’’سورہ التکاثر‘‘ پڑھا کریں… تاکہ مال کی محبت دل میں نہ داخل ہو جائے… ہفتے میں ایک بار ضرور قبرستان جا کر ایک آدھ گھنٹہ وہاں گزارہ کریں… اور یقین پیدا کیا کریں کہ میں نے بھی مرنا ہے، دفن ہونا ہے… وہاں جو مسلمان خصوصًا اپنے اقارب مدفون ہوں… ان کے ایصال ثواب کے لئے قرآن، دعائیں اور اذکار پڑھا کریں… مکتوب کچھ لمبا ہو گیا باقی باتیں اگلے مکتوب میں ان شاءاللہ۔

01/04/2023

زیارتِ قبور

اللہ تعالیٰ ’’اہل قبور‘‘ مسلمانوں پر رحم اور رحمت فرمائیں۔

ایک بات پکی ہے کہ ہم سب بھی اپنے اپنے وقت پر ’’اہل قبور‘‘ میں سے ہوجائیں گے… ’’ترکی‘‘ زبان میں ہر ’’قبر‘‘ کو ’’مزار‘‘ کہتے ہیں… جبکہ ہمارے ہاں ’’مزار‘‘ ان قبروں کو کہتے ہیں جن پر تعمیر ہو اور گنبد وغیرہ بنا ہو… حضور اقدس صلی اللہ علیہ وسلم بہت اہتمام سے ’’قبور‘‘ پر تشریف لے جاتے تھے… اور آپ صلی اللہ علیہ وسلم نے اپنی امت کو بھی اس کا حکم فرمایا ہے… اس لئے مسلمان مردوں کے لئے ’’زیارت قبور‘‘ واجب نہیں تو کم از کم ’’سنت مؤکدہ‘‘ ضرور ہے… آپ جانتے ہیں کہ ’’سنت مؤکدہ‘‘ کا کتنا بلند مقام ہوتا ہے؟… خواتین کو عمومی طور پر ’’زیارت قبور‘‘ کے لئے نہیں جانا چاہیے… مزاروں پر تو بالکل نہیں… البتہ اپنے اقارب اور اہل ایمان کی ’’قبور‘‘ پر بعض شرطوں کے ساتھ جا سکتی ہیں… چونکہ خواتین کے لئے شرطیں پوری کرنا مشکل ہوتا ہے… اس لئے نہ ہی جائیں تو بہتر ہے گھر بیٹھ کر ایصال ثواب کریں… اللہ تعالیٰ کا نظام بہت وسیع اور طاقتور ہے… گھر سے کیا ہوا ایصال ثواب ہی کافی ہو جاتا ہے… مرد حضرات قبرستان جایا کریں… خصوصا جمعہ کی رات اور دن… اپنے والدین، اقارب، شہداء کرام اور عام مسلمانوں کی قبور پر حاضر ہوں… قبرستان جا کر اہل قبور کو سلام کرنے اور ان کے لئے دعاء کرنے کا حکم احادیث صحیحہ میں موجود ہے… آپ صلی اللہ علیہ وسلم نے سلام کی کئی دعائیں سکھائی ہیں… یہ ایک دعاء یاد کر لیں:

’’اَلسَّلَامُ عَلَيْكُمْ أَهْلَ الدِّيَارِ مِنَ الْمُؤْمِنِيْنَ وَالْمُسْلِمِيْنَ، وَإِنَّا إِنْ شَاءَ اللّٰهُ تعَالٰی بِكُمْ لَاحِقُوْنَ نَسْئَلُ اللّٰهَ لَنَا وَلَكُمْ الْعَافِيَةَ۔‘‘ [صحیح مسلم]

امام طریقت حضرت خواجہ عبیداللہ احرار نقشبندی رحمہ اللہ تعالیٰ نے قبور پر ایصال ثواب کا ایک نافع طریقہ ارشاد فرمایا ہے کہ:

’’ مذکورہ بالاسلام اور دعاء پڑھنے کے بعد… ایک بار سورہ فاتحہ، ایک بار آیۃ الکرسی، بارہ بار سورۃ اخلاص اور دس بار درود شریف پڑھیں، اور دعاء کریں کہ اللہ تعالیٰ اس کا ثواب اس قبر والے یا قبر والی کو نصیب فرمادیں۔‘‘

اسی طرح بعض مشائخ کے نزدیک سورہ بقرہ کی اول، درمیانی اور آخری آیات، اور سورہ التکاثر اور سورہ یاسین پڑھنا بھی مفید ہے… بعض سخت مزاج لوگ قبور پر تلاوت وغیرہ سے منع کرتے ہیں… ان کی بے وزن اور بے دلیل بات اس حد تک مانی جا سکتی ہے کہ جب وہ انتقال کر جائیں تو کوئی ان کی قبر پر ایصال ثواب کے لئے کچھ نہ پڑھے۔

زیارت قبور کے لئے ایک بے حد مفید دعاء… حضرت حسن بصری سے منقول ہے… وہ اگلے مکتوب میں ان شاءاللہ۔

02/04/2023

بوسیدہ جسموں پر رحمت و راحت داخل فرمائیے

اللہ تعالیٰ نے ’’موت‘‘ کو ’’مؤمن‘‘ کے لئے تحفہ بنایا ہے… اور ’’قبر‘‘ کو اس کے لئے جنت کا باغ… کتنا عالیشان باغ؟… ہماری سوچ اور ہمارے وہم و گمان سے بھی زیادہ عالی شان۔

حضرت حسن بصری رحمہ اللہ تعالیٰ فرماتے ہیں کہ… جو قبروں پر جا کر یہ دعاء پڑھے گا… اس کے لئے حضرت سیدنا آدم علیہ السلام سے لے کر قیامت تک مرنے والے افراد کی تعداد میں نیکیاں لکھی جائیں گی… یعنی اربوں کھربوں سے بھی زیادہ نیکیاں… دعاء یہ ہے:

’’اَللّٰهُمَّ رَبَّ الْاَرْوَاحِ الْفَانِيَةِ وَالْأَجْسَادِ الْبَالِيَةِ وَالْعِظَامِ النَّخِرَةِ الَّتِيْ خَرَجَتْ مِنَ الدُّنْيَا وَهِيَ بِكَ مُؤْمِنَةٌ أَدْخِلْ عَلَيْهِمْ رَوْحًا مِّنْكَ وَسَلَاماً مِّنِّيْ۔‘‘

ترجمہ: ’’یا اللہ! فانی ارواح، بوسیدہ اجسام اور پرانی ہڈیوں والوں کے رب! ان میں جو دنیا سے آپ پر ایمان کی حالت میں گیا ان پر اپنی طرف سے راحت و رحمت داخل فرمائیے اور میری طرف سے ان پر سلام اتارئیے۔‘‘

حضرت حسن بصری رحمہ اللہ تعالیٰ کا یہ اثر ’’مصنف ابن ابی شیبہ‘‘ اور بعض دیگر کتب میں موجود ہے… ماشاءاللہ! بہت جامع، بہت نافع اور بہت وجد آفرین دعاء ہے… اس کے الفاظ پر غور کریں تو علم کے کئی باب کھلتے ہیں… اسی دعاء پر مشتمل ایک مرفوع روایت حضرت سیدنا عبداللہ بن مسعود رضی اللہ عنہ سے بھی مروی ہے… اس کی سند ضعیف ہے مگر حضرت حسن بصری رحمہ اللہ کا اثر اس کی تقویت کا ثبوت ہے… واللہ اعلم بالصواب۔

03/04/2023

یوم الفرقان… فیصلے کا دن

اللہ تعالیٰ نے ’’غزوہ بدر‘‘ کے دن کو ’’یوم الفرقان‘‘ قرار دیا ہے… حق اور باطل میں امتیاز اور فیصلے کا دن… حق اور باطل کی پہچان کا دن… حضور اقدس صلی اللہ علیہ وسلم ’’بارہ رمضان المبارک‘‘ 2ھ مدینہ منورہ سے روانہ ہوئے… تین سو تیرہ مجاہدین عالی مقام آپ کے ساتھ تھے… ارادہ تھا کہ قریش کے تجارتی قافلے پر حملہ کریں گے… اور موذی دشمن کی جابرانہ، ظالمانہ معیشت کو چوٹ پہنچائیں گے… مگر عرش پر فیصلہ کچھ اور تھا… اسی فیصلے کے تحت اللہ تعالیٰ نے تکوینی طور پر تجارتی قافلے کو بچا کر نکال دیا اور صنادید قریش کے مسلح، طاقتور لشکر کو مسلمانوں کے سامنے لاکھڑا کیا… قرآن مجید اس کی وجہ یہ بیان فرماتا ہے کہ اللہ تعالیٰ نے اپنے تین فیصلوں کو آج نافذ فرمانا تھا:

۱احقاقِ حق… ۲ابطالِ باطل… ۳قطع دابر الکافرین۔

یعنی حق کا حق ہونا سب کی آنکھوں کے سامنے ثابت ہو جائے… باطل کا باطل ہونا سب کو نظر آجائے… اور کافروں کی جڑ کٹ جائے۔

چنانچہ مقابلہ ہوا فرشتے اترے شیاطین نے زور لگایا… ایک لشکر میں نور ہی نور تھا حضرت آقا مدنی صلی اللہ علیہ وسلم اور سیدنا حضرت جبریل علیہ السلام… جب کہ دوسرے لشکر میں ظلمت ہی ظلمت تھی ابوجہل، اور ابلیس ملعون… ایک طرف طاقت تھی، تجربہ تھا، اسلحہ تھا، غرور تھا اور فتح کے بے شمار اسباب… جبکہ دوسری طرف ایمان تھا، اخلاص تھا، سرفروشی اور فداکاری تھی، مگر نہ تعداد نہ تیاری… جنگ سے پہلے کی آخری رات عجیب تھی اس رات کی دعاؤں اور آہ وزاری نے قیامت تک کے مسلمانوں کے لئے فتوحات کے دروازے کھلوا دئیے… جنگ سے پہلے مقابلہ یکطرفہ تھا کوئی ایک ظاہری سبب بھی مسلمانوں کی فتح کا موجود نہیں تھا… مگر جب تلواروں نے میان چھوڑے اور سرفروشوں نے دنیا کی ہر خواہش دل سے نکال کر تکبیر کا نعرہ بلند کیا تو… پھر اسباب بھی ان کے ساتھ آکھڑے ہوئے… باقی اگلے مکتوب میں ان شاءاللہ۔

05/04/2023

یوم الفرقان… فیصلے کا دن۲

اللہ تعالیٰ کے بندے، اللہ تعالیٰ کو اپنی جانیں بیچنے پر آئے تو پھر زمین تا آسمان ہر چیز ان کے ساتھ ہوگئی… کافر اس لشکر میں اپنے ان افراد کو لے آئے تھے جو اس زمانے اور اس خطے میں ’’کفر‘‘ کی جڑ تھے… غزوہ بدر میں یہ ’’جڑ‘‘ کٹ گئی تو پھر دوبارہ اس خطے میں ’’کفر‘‘ کبھی کھڑا نہ ہوسکا… اگرچہ غزوہ احد میں کفار پوری طاقت سے اترے، غزوہ خندق میں وہ پوری جمعیت کے ساتھ آئے… مگر چونکہ ان کی جڑ کٹ چکی تھی تو ان کا ہر قدم اب پسپائی اور خاتمے کی طرف ہی بڑھ رہا تھا… قرآن مجید کا اعجاز دیکھیں… فرمایا ’’وَيَقْطَعَ دَابِرَ الْكَافِرِيْنَ‘‘۔

غزوہ بدر میں مقصود کافروں کی ’’جڑ‘‘ کاٹنا تھا… وہ دن اور آج کا دن تقریبا ساڑھے چودہ سو سال گزر چکے… اس خطے میں کفر دوبارہ برسر اقتدار نہیں آسکا… حالانکہ ہر دو چار صدیوں کے بعد دنیا میں تبدیلیاں آتی ہیں… کیا اب بھی قرآن مجید کے ’’کلام الٰہی‘‘ ہونے میں کوئی شک کرسکتا ہے؟… قرآن مجید کا ایک ایک لفظ اس بات کی تصدیق کرتا ہے کہ یہ واقعی اللہ تعالیٰ کا کلام ہے اور اس میں فرمائی گئی ہر بات سچی اور صادق ہے… غزوہ بدر نے ایمان اور کفر کو الگ الگ کر دیا اور بالکل واضح کر دیا… چنانچہ اب بھی جو ’’غزوہ بدر‘‘ والوں کے ساتھ ہیں ان کے لئے ایمان بھی واضح ہے اور کفر بھی واضح… مگر جو ’’غزوہ بدر‘‘ کو بھول گئے وہ کافروں کی تھوڑی سی ترقی اور غلبہ دیکھ کر پھسلنے لگتے ہیں، بہکنے لگتے ہیں… کیونکہ وہ ’’یوم الفرقان‘‘ کی کسوٹی سے محروم ہیں… غزوہ بدر میں جہاد ہوا… کونسا جہاد؟… یقینا قتال فی سبیل اللہ… اسی ’’قتال فی سبیل اللہ‘‘ ہی کو حق کے احقاق اور غلبے کا ذریعہ بنایا گیا… اب وہ لوگ جو جہاد کو نہیں مانتے، یا جہاد کا معنٰی بدلتے ہیں، یا مسلمان ہو کر بھی جہاد کی مخالفت کرتے ہیں، یا پوری زندگی جہاد کی نیت تک نہیں کرتے وہ مسلمان کہاں کھڑے ہیں؟… ان کا غزوہ بدر سے کیا تعلق ہے؟… ان کا غزوہ بدر کے سالار حضرت محمد صلی اللہ علیہ وسلم سے کیا تعلق ہے؟

وہ سوچیں، فکر کریں اور توبہ کریں… اور وہ خوش نصیب جو جہاد فی سبیل اللہ کو مانتے ہیں، اس میں شرکت کا شرف رکھتے ہیں، اور اس میں حصہ ڈالتے ہیں… وہ اپنی خوش نصیبی پر اللہ تعالیٰ کا شکر ادا کریں۔

یہی ’’یوم الفرقان‘‘ کا ہر زمانے کے لئے فیصلہ ہے… جہاد اور حق آپس میں لازم ملزوم ہیں… جہاد کو مانے بغیر کوئی حق کو نہیں پا سکتا… مغرب سے جمعہ شریف اور مقابلہ حسن مرحبا۔

06/04/2023

دو تاریخ ساز تقریریں

اللہ تعالیٰ ہماری طرف سے اور ساری امت کی طرف سے… اُن دو حضرات کو بہترین جزائے خیر عطاء فرمائے… جن دونوں کی والہانہ خطابت نے حضرت آقا محمد مدنی صلی اللہ علیہ وسلم کے دل مبارک کو خوشی اور سرور سے بھر دیا… ان دو عظیم المرتبت افراد میں سے ایک ہیں حضرت سیدنا مقداد بن اسودرضی اللہ عنہ… اور دوسرے ہیں حضرت سیدنا سعد بن معاذرضی اللہ عنہ… غزوہ بدر میں جب مسلمانوں کو معلوم ہوا کہ تجارتی قافلہ نکل گیا ہے اور قریش کا لشکر سامنے آرہا ہے تو آپ صلی اللہ علیہ وسلم نے اپنے جانثار صحابہ کرام رضوان اللہ تعالیٰ علیہم اجمعین سے مشورہ لیا… اس موقع پر اسلامی لشکر کے لئے مدینہ منورہ واپسی آسان تھی… مشرکین کے لشکر سے لڑنے کی نہ ان کے پاس تیاری تھی اور نہ وہ اس سوچ سے نکلے تھے… مگر حضرت آقا مدنی صلی اللہ علیہ وسلم ’’جہاد‘‘ کا عزم فرما چکے تھے… اس موقع پر جب آپ صلی اللہ علیہ وسلم نے حضرات صحابہ کرام رضوان اللہ علیہم اجمعین سے رائے لی… تو حضرت سیدنا صدیق اکبر اور حضرت سیدنا عمر فاروق رضی اللہ عنھمانے سب سے پہلے اطاعت اور جانثاری کے عزم کا اعلان فرمایا… اور پھر حضرت سیدنا مقداد بن اسودرضی اللہ عنہ کھڑے ہوئے اور ایسا خطاب فرمایا کہ زمین و آسمان بھی جھوم اٹھے… انہوں نے فرمایا:

’’یا رسول اللہ صلی اللہ علیہ وسلم! آپ کو اللہ تعالیٰ نے جس چیز کا حکم فرمایا ہے آپ اسے پورا فرمائیں ہم سب آپ کے ساتھ ہیں… اللہ کی قسم ہم بنی اسرائیل کی طرح یہ ہرگز نہیں کہیں گے کہ اے موسی علیہ السلام! تم اور تمہارا رب جا کر لڑو، ہم تو یہیں بیٹھے ہیں… بلکہ ہم کہیں گے یا رسول اللہ صلی اللہ علیہ وسلم! آپ اور آپ کا رب قتال فرمائے، ہم بھی آپ کے ساتھ مل کر جہاد و قتال کریں گے… یا رسول اللہ صلی اللہ علیہ وسلم! ہم آپ کے دائیں، بائیں اور آگے پیچھے ہر طرف دشمن سے لڑیں گے۔‘‘

حضرت سیدنا عبداللہ بن مسعود رضی اللہ عنہ فرماتے ہیں… یہ الفاظ سن کر آپ صلی اللہ علیہ وسلم کا چہرہ مبارک خوشی سے چمک اٹھا… مگر آپ صلی اللہ علیہ وسلم حضرات انصار کے جذبات معلوم فرمانا چاہتے تھے… تب انصار کے سردار حضرت سیدنا سعد بن معاذرضی اللہ عنہ کھڑے ہوئے اور ایسا فصیح و بلیغ، والہانہ اور جانثارانہ خطاب فرمایا کہ… تا قیامت یہ خطاب انصار کے سر کا تاج بن کر چمکتا رہے گا… اس مبارک خطاب کے چند الفاظ یہ بھی ہیں:

’’یا رسول اللہ صلی اللہ علیہ وسلم! ہم ہر حال میں آپ کے ساتھ ہیں… ہمارے اموال میں سے جتنا چاہیں آپ قبول فرمائیں اور جتنا چاہیں ہمیں عطاء فرمائیں… جو آپ قبول فرمائیں گے وہ ہمارے لئے اس سے زیادہ محبوب ہو گا جو آپ ہمارے لئے چھوڑ دیں گے… آپ اگر ہمیں ’’برک الغماد‘‘ جانے کا حکم دیں گے تو ضرور ہم آپ کے ساتھ جائیں گے… قسم اس اللہ کی! جس نے آپ کو حق دے کر بھیجا ہے اگر آپ ہم کو سمندر میں کود جانے کا حکم دیں گے تو ہم اسی وقت سمندر میں کود پڑیں گے اور ہم میں سے ایک شخص بھی پیچھے نہ رہے گا… ہم دشمنوں سے لڑنے کو نا پسند نہیں کرتے بلکہ ہم لڑائی میں ڈٹ جانے والے اور مقابلہ کے سچے ہیں… اللہ تعالیٰ سے امید ہے کہ اللہ تعالیٰ ہم سے آپ کو وہ چیز دکھائے گا… جس سے آپ کی آنکھیں ٹھنڈی ہوں گی… پس آپ اللہ تعالیٰ کے نام کی برکت سے ہمیں میدان میں لے چلیں۔‘‘

07/04/2023

مقابلہ مبارک

اللہ تعالیٰ ہمیں ’’غزوہ بدر‘‘ ’’غازیان بدر‘‘ اور ’’شہداء بدر‘‘ کے ساتھ ’’نسبت‘‘ نصیب فرمائیں۔

غزوہ بدر ایمان اور عشق کی سچی داستان ہے… غزوہ بدر دارین میں اونچی کامیابی کا نصاب ہے… غزوہ بدر اسلام کے غلبے کا راز ہے۔

۱ غزوہ بدر اول تا آخر ’’اقدامی جہاد‘‘ تھا… اول یوں کہ مسلمان خود قریش کے تجارتی قافلے پر حملے کے لئے نکلے… اور آخر یوں کہ قریش کے لشکر کا ’’بدر‘‘ میں جشن منا کر واپسی کا ارادہ تھا مگر اسلامی لشکر ان سے مقابلے کے لئے وہاں پہنچ گیا… اس لئے جو بھی اسلام کے ’’اقدامی جہاد‘‘ کو نہیں مانے گا وہ ہمیشہ… ’’اسلامی عزت‘‘ اور غزوہ بدر کی نسبت سے دور رہے گا۔

۲ غزوہ بدر میں ’’احقاقِ حق‘‘ ہوا… ’’ابطالِ باطل‘‘ ہوا… چنانچہ جب تک مسلمان دین اسلام کی خاطر جان کی قربانی پیش نہیں کرتے اور میدان جہاد میں نہیں اترتے اس وقت تک… حق کا حق ہونا اور باطل کا باطل ہونا دنیا پر ظاہر نہیں ہوتا… آج مسلمانوں کے پاس سب کچھ ہے مال، افراد، حکومتیں، فوجیں اور اسلحہ … مگر دین اسلام پر جان دینے اور میدان جہاد میں اترنے کا جذبہ عمومی طور پر موجود نہیں… تو آج نعوذباللہ اسلام اور مسلمانوں کو دنیا بھر میں سب سے پسماندہ اور تیسرے درجے کی قوم سمجھا جاتا ہے… اے مسلمانو! اللہ کے لئے شرعی جہاد کی طرف لوٹ آؤ۔

۳ غزوہ بدر 17 رمضان کو ہوا… یہ حجامہ کا بھی دن ہے… عرب کے معاشرے میں کفر ہی کفر تھا… غزوہ بدر میں جہاد والاحجامہ ہوا… صرف ستر کپ لگے اور پورا جزیرہ عرب کفر کی غلامی سے نکلنے کے قابل ہوگیا… جہاد میں بہت کم خون بہتا ہے… اور بہت زیادہ امن قائم ہوتا ہے۔

دین کے دیوانوں کو غزوہ بدر سے نسبت اور اس دن کا شاندار مقابلہ مبارک ہو… تیمرگرہ، لاہور اور مردان نے عالی شان جذبات کا اظہار کرکے بہت سی دعاؤں کو سمیٹ لیا ہے۔

08/04/2023

مَاشَاءَاللہُ لَا قُوَّۃَ اِلَّا بِاللہِ

اللہ تعالیٰ کا شکر، دل سے شکر، روح سے شکر… اَلْحَمْدُلِلہِ رَبِّ الْعَالَمِیْنَ… بدری مقابلہ شاندار رہا،تاریخی رہا،عجیب با برکت اور پرنور رہا… سب محنت کرنے والوں کا شکریہ، دعاء اور فکر کرنے والوں کا شکریہ، سخاوت کا ہاتھ پھیلانے والوں کا شکریہ۔

اللہ تعالیٰ آپ سب کو بدر والوں کی نسبت عطاء فرمائیں… ڈھیروں جزائے خیر عطاء فرمائیں… آپکی، آپ کے والدین اور اہل و عیال کی مغفرت فرمائیں… اور آپ کو دنیا و آخرت کی ناکامی، تنگی، ذلت اور رسوائی سے بچائیں۔

غازیان بدر اور شہدائے بدر کے مبارک ناموں کی حرارت کہ کراچی کے شیر بھی جاگ اٹھے اور سبقت لے اڑے… اور اہل کشمیر نے نئی تاریخ رقم کی … صوبہ سیدنا ابوبکر صدیق رضی اللہ عنہ نے بڑے صوبوں میں اور صوبہ سیدنا طلحہ رضی اللہ عنہ نے چھوٹے صوبوں میں… ’’تاج اولیت و سابقیت‘‘ حاصل کیا… جبکہ اضلاع میں یہ تاج ضلع سیدنا امیر حمزہ رضی اللہ عنہ اور ضلع سجاد آباد نے سر پر سجایا… ان سب کا خصوصی شکریہ اور ان کے لئے خصوصی دعائیں… باقی بھی الحمدللہ کوئی پیچھے نہیں رہا… مقابلہ جذبے اور اخلاص سے بھرپور کانٹے دار رہا… اور نتیجہ گزشتہ بائیس سال میں سب سے اونچا… مَاشَاءَ اللہُ لَا قُوَّۃَ اِلَّا بِاللہِ۔

آئیے! اللہ تعالیٰ کے اس عظیم فضل اور نصرت پر اللہ تعالیٰ کا شکر ادا کریں… شکرانے کے نوافل ادا کریں… اور اللہ تعالیٰ کی سچی بندگی اور حضرت آقا مدنی صلی اللہ علیہ وسلم کی سچی غلامی کا عہد تازہ کریں… ایمان، اطاعت، تقویٰ، امانت اور دین اسلام کے لئے ہر طرح کی قربانی کا عہد۔

10/04/2023

ایک رکوع روزانہ

اللہ تعالیٰ ہمیں قرآن مجید سے جوڑ دیں… ہمیشہ کا دوست، ہمیشہ کا ساتھی قرآن مجید، ہمیشہ کا رہبر، ہمیشہ کا سفارشی قرآن مجید۔

آپ یقین کریں کوئی شخص ساری دنیا کا علم پڑھ لے مگر وہ قرآن مجید کو نہ سمجھے تو وہ جاہل ہے… الحمدللہ! اکثر مسلمان قرآن مجید کی تلاوت کرتے ہیں مگر تلاوت کے دوران ان کا ذہن کہاں ہوتا ہے، دماغ کہاں ہوتا ہے؟… اگر وہ قرآن مجید کو سمجھتے تو پھر تلاوت کا مزا ہی کچھ اور ہوتا… خیر تلاوت کرتے رہنا چاہیے سمجھ آئے یا نہ آئے… جن کو سمجھ نہیں آتا وہ الفاظ پر توجہ کیا کریں اور سوچا کریں کہ ہر لفظ اللہ تعالیٰ کا کلام ہے اور ہر لفظ کے ساتھ ایک نور میرے دل میں اتر رہا ہے… اب ماشاءاللہ رمضان المبارک کا آخری عشرہ شروع ہونے والاہے… پکی نیت کرلیں کہ ان شاءاللہ اس سال قرآن مجید کو زیادہ سے زیادہ سمجھ کر پڑھنے کی کوشش کروں گا۔

ترتیب یوں بنالیں کہ روز کی تلاوت… ایک پارہ یا آدھا پارہ الگ وہ کبھی نہ چھوڑیں وہ دل کی اور ایمان کی چارجنگ ہے… اور اس کے ساتھ روزانہ آدھا گھنٹہ مزید قرآن مجید سمجھنے کے لئے اس میں بس ایک رکوع پڑھیں، اس کا ترجمہ سمجھیں، تفسیر سمجھیں… اور اس وقت تک اسے پڑھتے رہیں جب تک کہ معلوم نہ ہو جائے کہ میرے اللہ تعالیٰ نے اس میں کیا فرمایا ہے۔

اگر آپ نے روز آدھا گھنٹہ قرآن مجید سمجھنے کے لئے وقف کردیا تو آپ کی زندگی نور اور سرور سے بھر جائے گی ان شاءاللہ… اور نیت یہ کریں کہ میں اپنے لئے قرآن مجید سمجھ رہا ہوں… میرے اللہ تعالیٰ نے یہ میرے لئے بھی اتارا ہے… اللہ تعالیٰ نے اس میں مجھ سے باتیں فرمائی ہیں… یہ میرے نام میرے رب کا خط ہے اور میں نے اسے ضرور سمجھنا ہے… آج کل ہم جو کچھ موبائل وغیرہ پر دیکھتے اور پڑھتے ہیں اس میں زہر ہی زہر بھرا ہوتا ہے… حتیٰ کہ دنیا کے گندے ترین افراد کی عظمت دل میں اتر جاتی ہے… صرف قرآن مجید کا نور ہی ہمارے دلوں کو اس زہر سے پاک کر سکتا ہے… اور کچھ نہیں تو زندگی میں صرف ایک بار تو پورا قرآن مجید سمجھ کر پڑھ لیں… یہ ہمیشہ کام آنے والی دولت اور خزانہ ہے۔

آج عصر کے بعد جو حضرات و خواتین اعتکاف بیٹھیں گے… ان کے لئے دل سے دعاء ہے… اور ان سے دعاء کی درخواست ہے۔

11/04/2023

علم نور ہے

اللہ تعالیٰ ہمیں ’’علم‘‘ کا ’’نور‘‘ عطاء فرمائیں… اللہ تعالیٰ ہمیں ’’نور‘‘ کا علم عطاء فرمائیں… ’’علم نافع‘‘ کا نور اسی کو نصیب ہوتا ہے جو خود کو جاہل (یعنی نہ جاننے والا) سمجھتا ہے… لیکن جو خود کو عالم (یعنی جاننے والا) سمجھ بیٹھے وہ علم سے محروم ہوجاتا ہے… علم کے بڑے بڑے امام خود کو ’’بے علم‘‘ سمجھتے تھے اور مرتے دم تک ’’علم‘‘ کی طلب اور جستجو میں رہتے تھے… حضرت آقا محمد مدنی صلی اللہ علیہ وسلم ارشاد فرماتے ہیں… اِنَّمَا بُعِثْتُ مُعَلِّمًا… مجھے علم سکھانے والابنا کر بھیجا گیا ہے… اللہ تعالیٰ نے اپنے محبوب ترین اور آخری نبی حضرت محمد صلی اللہ علیہ وسلم کو اتنا زیادہ علم عطاء فرمایا کہ ایسا علم نہ پہلے کسی کو ملا اور نہ آئندہ کسی کو ملے گا… مگر اتنے عظیم علم کے ساتھ یہ دعاء بھی تلقین فرمادی:

’’وَ قُلْ رَّبِّ زِدْنِیْ عِلْمًا۔‘‘

’’اے نبی(صلی اللہ علیہ وسلم) آپ دعاء مانگا کریں کہ اے میرے رب مجھے اور زیادہ علم عطاء فرما… میرے علم میں اضافہ فرما۔‘‘

’’علم‘‘ جنت کا راستہ ہے… اور علم حاصل کرنے کے لئے کسی عمر کی کوئی شرط نہیں… ایسے افراد بھی امت میں گزرے ہیں جنہوں نے کہولت اور بڑھاپے میں علم حاصل کرنا شروع کیا… مگر اپنے اخلاص اور محنت کی بدولت علم میں بڑا مقام حاصل کر لیا… در اصل علم کے بغیر اندھیرا ہی اندھیرا ہے اور خطرہ ہی خطرہ ہے… رمضان المبارک کے آخری عشرے کی مبارک راتوں میں اللہ تعالیٰ سے ’’علم‘‘ بھی مانگیں… اس کے لئے دو دعائیں بڑی شاندار اور طاقتور ہیں:

۱ رَبِّ زِدْنِیْ عِلْمًا۔

۲ اَللّٰهُمَّ إِنِّيْ أَسْأَلُكَ عِلْمًا نَافِعًا وَرِزْقًا طَيِّبًا وَعَمَلًا مُتَقَبَّلًا۔

یہ دونوں دعائیں صبح و شام کم از کم تین بار خود پر لازم کر لیں اور جب یہ دعائیں رنگ دکھانا شروع کردیں… تو علم کا آغاز قرآن مجید کے علم سے کریں… اور اس کے بعد اور دیگر مبارک علوم حاصل کرتے جائیں یہاں تک کہ زندگی کا آخری دن بھی علم کی تحصیل سے خالی نہ جائے۔

12/04/2023

دائمی آزادی کا سفر

اللہ تعالیٰ سے… اللہ تعالیٰ کی رضا اور ’’جنت الفردوس الاعلی‘‘ کا سؤال ہے… اللہ تعالیٰ نے ہمیں پیدا فرمایا… ہماری ’’روح‘‘ ایک ایسے ’’جہان‘‘ میں رکھی جو بہت دور ہے… اس جہان کا نام ہے ’’عالم ارواح‘‘ یعنی روحوں کا جہان… پھر اپنے وقت پر اللہ تعالیٰ نے ہمارے لئے ایک جسم بنایا … یہ جسم جب روح کو اٹھانے کے قابل ہوا تو ماں کے رحم میں ہماری روح کو ہمارے جسم میں ڈال دیا گیا اور ساتھ تاریخ بھی دے دی گئی کہ اس تاریخ تک یہ روح اس جسم میں رہے گی… انسان بھی عجیب مسافر ہے، عجیب قیدی ہے… ایک سفر سے دوسرا سفر اور ایک قید سے دوسری قید… ایک طرف یہی انسان زمین کی ساری مخلوق کا سردار اور حاکم اور دوسری طرف یہی انسان کمزور، بے بس اور ضعیف ترین مخلوق۔

روح سفر کرتی ہے وہ ’’عالم ارواح‘‘ سے جسم میں آتی ہے… پھر موت کے وقت وہ ایک اور جہان میں چلی جاتی ہے جس کا نام ’’عالم برزخ‘‘ ہے… مگر اب روح اور جسم میں تعلق کسی نہ کسی طرح قائم رہتا ہے کیونکہ ہمارے اسی جسم نے دوبارہ بننا ہے… ہماری انہی ہڈیوں نے دوبارہ بنایا جانا ہے اور پھر اسی جسم میں روح نے قیامت کے دن واپس آنا ہے… اس دوران روح پر کیا گزری، جسم پر کیا گزری… یہ دونوں آپس میں ایک دوسرے کو سنا بھی نہیں پائیں گے کہ قیامت کا ہولناک اور خوفناک دن شروع ہو جائے گا… اندازہ لگائیں! مثال کے طور پر پاکستان کے 23 کروڑ افراد ایک میدان میں جمع ہوں کیا حالت ہوگی؟… وہاں تو کھربوں انسان ایک میدان میں جمع ہوں گے اور سورج سر کے بالکل اوپر چند ہاتھ کے فاصلے پر ہوگا۔

پھر جن کو جنت مل گئی ان کی روح بھی کامیاب اور جسم بھی کامیاب… اور جو جہنم میں گئے ان کی روح بھی قید اور ناکام اور جسم بھی ناکام… اور جو ’’اعراف‘‘ میں لٹکے رہے ان کا بھی مشکل حال۔

بس بھائیو! اور بہنو! وقت تھوڑا ہے روح کو بھی جنت کے قابل بنانا ہے اور جسم کو بھی… اور ان دونوں میں سے کسی کو بھی گناہ اور غفلت میں نہیں ڈبونا… رمضان کے آخری عشرے میں جہنم سے پناہ مانگی جائے تاکہ مسافر اور قیدی انسان کا اختتام شاندار اور دائمی آزادی پر ہو۔

13/04/2023

معمولی بات نہیں ہے

اللہ تعالیٰ ہمیں اپنے محبوب بندوں میں شامل فرمائیں۔

کل کے مکتوب کا آخری جملہ اس طرح کرلیں:

تاکہ مسافر اور قیدی انسان کے سفر کا اختتام… شاندار اور دائمی آزادی پر ہو۔

ہر انسان سفر میں ہے… اور ایک مؤمن کو چاہیے کہ دنیا میں ایک مسافر اور ایک قیدی کی طرح زندگی گزارے… اللہ تعالیٰ کے احکامات کی پابند زندگی… شیطان اسی کوشش میں لگا رہتا ہے کہ انسان کو آزاد زندگی پر لے آئے… وہ آزاد زندگی جس کے بعد قید ہی قید ہے، عذاب ہی عذاب ہے… جب کہ دین کی پابند زندگی کے بعد آزادی ہی آزادی ہے اور عیش ہی عیش ہے… قبروں والے اس راز کو سمجھ چکے… کاش ہم قبر میں جانے سے پہلے ہی سمجھ لیں… اگر کوئی مسلمان چاہتا ہے کہ اس کے مرنے کے بعد بھی اس کا نامۂ اعمال بھاری، وزنی اور روشن ہوتا رہے تو وہ تین کاموں پر محنت کرے:

۱اولاد کی اچھی دینی تربیت… اولاد کے نیک اعمال والدین کے نامۂ اعمال میں بھی جگہ پاتے ہیں۔

۲دین کے علم سے مضبوط تعلق جوڑے… علم سیکھے، علم سکھائے، علم پھیلائے اور علم کی خدمت کرے… اس عمل کا اجروثواب صدیوں تک چلتا ہے۔

۳صدقہ جاریہ کی حرص رکھے… یعنی بخل اور دل کی تنگی سے نکل کر اپنے مال کے ذریعہ ایسے کام کرے… جن کی خیر جاری رہے مثلاً جہاد میں مال لگانا، مسجد بنانا وغیرہ… اور جو مسلمان چاہتا ہو کہ اس کے مرنے کے بعد اس کے اعمال اس کی زندگی سے بھی زیادہ ہوں… وہ اپنے نفس کی خواہشات قربان کرے اور دین کے لئے ایسی محنت کرے کہ اس کی محنت، مشقت اور ریاضت پر اللہ تعالیٰ کو پیار آجائے۔

اور جو مسلمان چاہتا ہو کہ زندگی، موت اور حساب کتاب کے عمومی قانون سے نکل کر… اللہ تعالیٰ کے فضل والے خاص قانون میں آجائے… تو وہ سچے دل سے شہادت کی دعاء اور تمنا کرے اور شہادت کے راستے کو اختیار کرے… تب اس پر جو موت آئے گی وہ بھی زندگی ہوگی… تب وہ مر کر بھی نہیں مرے گا… اور ایسا اکرام پائے گا کہ جنت میں جا کر بھی واپس آکر دوبارہ شہادت کا وہی اکرام چاہے گا… اور اسے حساب نہیں دینا پڑے گا بلکہ وہ حساب وصول کرے گا۔

ہاں بھائی! اللہ تعالیٰ کے لشکر میں آکر کھڑا ہو جانا… کوئی معمولی بات نہیں ہے۔

14/04/2023

فلسطین اور کشمیر

اللہ تعالیٰ ’’فلسطین‘‘ کو بزدل یہودیوں سے… اور ’’کشمیر‘‘ کو ناپاک مشرکین سے آزادی عطاء فرمائیں… اس سال رمضان المبارک میں یہودیوں نے مسجد اقصیٰ پر تالے ڈالے، نمازیوں کو شہید کیا اور تشدد کا نشانہ بنایا… فلسطین کے بہادر، سرفروش اور جانباز مسلمانوں نے اپنی طاقت اور بساط کے مطابق ’’مقابلہ‘‘ کیا اور رمضان المبارک کو افضل ترین عبادت کے ذریعہ پا لیا… ایک طرف ساری دنیا اور دوسری طرف اکیلے فلسطینی مجاہد… مگر ماشاء اللہ ان کا ایمان دیکھیں، ہمت دیکھیں، اور سرفروشانہ ادائیں دیکھیں!… روز جنازے اٹھاتے ہیں مگر نہ جھکے، نہ بکے اور نہ پیچھے ہٹے… اللہ تعالی ان کی نصرت فرمائیں… ان تک مدد پہنچانے کے راستے ہموار فرمائیں… ہم مسلمان الحمدللہ تیار ہیں… اس مبارک جہاد میں شرکت اور شمولیت کے بے حد خواہشمند ہیں… اور اللہ تعالیٰ کی رحمت سے مایوس نہیں ہیں۔

سوشل میڈیا کے کھلاڑی… امت مسلمہ کو مایوس اور ذلیل کرنے کے لئے طرح طرح کی ویڈیوز اور پیغامات پھیلاتے رہتے ہیں… جلے ہوئے گھروں اور سرخ جنازوں کے ذریعے ’’لائکس‘‘ اور ’’کمنٹس‘‘ کماتے ہیں اور مسلمانوں کو عملی جذبات تک نہیں پہنچنے دیتے… دوسری طرف انڈیا کی ناپاک اور غلیظ مودی حکومت نے … سری نگر کی جامع مسجد پر تالے ڈال دیئے ہیں… کشمیری مسلمان مزاحمت اور مقابلے کے لئے ہمہ وقت تیار ہیں… ان شاءاللہ جامع مسجد بھی کھل جائے گی اور کشمیر بھی آزاد ہوگا… کیونکہ کشمیر کے پہاڑوں اور وادیوں میں ’’شہداء کرام‘‘ بستے ہیں… پاکستان میں اپنے اقتدار کے لئے کشمیر کا سودا کرنے والے اقتدار سے محروم ہو چکے ہیں… اور اپنی معیشت کے لئے کشمیر کو بیچنے والے سخت معاشی گرداب میں پھنس چکے ہیں… اب جن کے پاس اختیار ہے وہ اللہ تعالیٰ کے ان تکوینی فیصلوں کو سمجھیں اور کشمیر کی تحریک کے لئے مخلص ہو کر دارین کی سعادت اور عزت سمیٹیں… یا اللہ امت محمد صلی اللہ علیہ وسلم کو ایمان و غیرت سے سرشار اچھے حکمران نصیب فرما۔

15/04/2023

محبت سے لبریز تحفہ

اللہ تعالیٰ نے اپنے محبوب ترین نبی حضرت محمد صلی اللہ علیہ وسلم کو دعاء سکھائی: